O psicólogo deportivo Joaquín Sorribas incorpórase desde hoxe á organigrama do RC Deportivo como responsable da área conductual e motivacional do club, dentro da estrutura do novo Servizo de Atención ao Rendemento do Futbolista (SARF), nunha importante aposta para coordinar e reforzar todos os aspectos de mellora no rendemento dos e as futbolistas de todas as categorías neste ámbito.
O SARF, que depende da dirección deportiva encabezada por Fernando Soriano, estará desde agora organizado en dúas áreas: a do ámbito físico está dirixida como até agora polo doutor Álex Mejuto, do que dependen os servizos médicos, que forman os doutores Moncho Barral e Manuel Astray, após a recente saída do club do doutor Carlos Lariño, así como as áreas de nutrición, podoloxía e preparación e readaptación física.
A nova área conductual e motivacional estará dirixida por Joaquín Sorribas, que se dedicará especialmente ao primeiro equipo masculino e feminino e as súas filiais. Del dependerán por unha banda a área de psicoloxía con Jacobo Ceide e por outra a área de desenvolvemento persoal con Elkin Flórez. Jacobo Ceide xa estaba a exercer como psicólogo do club até agora sobre todo na área formativa, traballando tamén con futbolistas do primeiro equipo masculino e feminino, e coa incorporación de Sorribas centrarase por completo no ámbito formativo.
Elkin Flórez, pola súa banda, será o responsable de desenvolvemento persoal dos xogadores e xogadoras, cun papel fundamental no caso de menores e futbolistas que viven na residencia do club. Deste xeito, o papel de Elkin Flórez e Jacobo Ceide será moi relevante para apoiar aos e as futbolistas en todos os aspectos do seu desenvolvemento desde a súa chegada ao club.
Joaquín Sorribas conta co grao de psicoloxía con formación específica en psicoloxía do deporte e alto rendemento, ademais de ser diplomado en maxisterio de educación física e licenciado en psicopedagoxía. Chega ao RC Deportivo desde a Valencia CF, onde exerceu até agora como director do departamento de psicoloxía da súa Academia, formando parte do seu corpo técnico e con traballo específico con xogadores do primeiro equipo. Tamén foi asesor psicoemocional de corpo técnico do CD Toluca, da primeira división de México, e previamente traballou no CD Toledo. Conta cunha ampla experiencia no mundo do fútbol tamén como xogador en diversos equipos de Segunda División e Segunda B.
