Lucas Dominique Noubi Ngnokam (Mouscron, Bélxica, 15 de xaneiro de 2005), coñecido futbolísticamente como Lucas Noubi, foi presentado este mediodía como novo xogador do Dépor até xuño de 2029.
En primeiro lugar o novo central, acompañado por Fernando Soriano, pousou para os medios gráficos no campo 2 da Cidade Deportiva.
Xa na sala de prensa, o Director de Fútbol definiuno como un "central destro do ano 2005, 20 anos. Firma por 4 temporadas. Chega libre do Standard de Lieja. Pode xogar nas posicións de defensa, prioritariamente central, pero tamén de lateral esquerdo e dereito".
Destaca as súas grandes "calidades físicas, á parte de ter un gran desprazamento e entendemento do xogo. É un xogador de proxección que levabamos seguindo desde hai tempo".
Conta que "durante o ano vimos que era unha posición que debiamos cubrir pola finalización de contratos de Jaime e de Pablo Martínez. Levabámoslle vendo un tempo. Déronnos a información de que non ía competir no primeiro equipo por problemas de renovación. Estivemos a velo en directo varias veces, en adestramentos... seguíndoo un pouquiño máis de preto".
Advertiu finalmente Fernando Soriano que a súa chegada ao Dépor "non foi fácil. Loitou moito por estar aquí. Nas negociacións meteuse algún que outro equipo e as súas visitas á Coruña durante a pasada temporada fixéronlle decantarse polo Deportivo".
Pola súa banda, Lucas Noubi esforzouse na súa primeira comparecencia pública como xogador do Dépor en falar algunhas palabras de español.
Após os primeiros adestramentos ás ordes de Antonio Hidalgo destaca que no equipo "hai moitos xogadores de moita calidade. Obviamente Yeremay coñecémolo todos. Non podo dar nomes porque todos teñen moita calidade. Xa me tarda xogar con eles".
Confesa que "vin aquí 3 veces. Vin 2 partidos. Visitei a cidade, as instalacións e estou moi contento de estar aquí".
Admite que a pasada temporada, relegado á suplencia no seu Club, "foi moi difícil para min porque viña de xogar moito e xoguei moi pouco. Serviume para mellorar mentalmente, para facerme máis forte. Estou preparado para a temporada que vai empezar e con ganas de xogar".
O defensor deportivista defínese como "un xogador rápido, moi agresivo. Gústame ter a posesión do balón, son un gañador e traballador".
Desvela que a chamada do Dépor chegoulle "cando era un axente libre. O meu pai e o meu axente faláronme da posibilidade de vir. O Dépor é un club con moita historia no fútbol español e no europeo. Axiña que como me contactou Fernando Soriano voei aquí e xa tiña claro que quería vir aquí".
Despois dun ano no que apenas xogou 2 partidos, Lucas Noubi sostén que "adestrei moito porque sabía que ía irme a outro Club e necesitaba traballar máis que os outros xogadores que estaban a xogar. Adestrei moito no campo, no ximnasio para estar preparado para onde fose o ano seguinte".
Finalmente, apunta que a súa adaptación foi "moi rápido porque os meus compañeiros e o staff son moi bos e axúdanme moito".
E márcase como meta esta primeira temporada "traballar moito, axudar ao equipo e evolucionar como futbolista".
