Manuel Pablo apuntou na sala de prensa do Dépor Training Center que "pensabamos que podiamos sacar algo positivo de Luanco. O vento condicionou tamén o desenvolvemento do partido. Custounos na primeira parte. Na segunda tivemos máis dominio do xogo pero aínda así as accións eran de dificultade máxima. Demos o punto por bo dada a situación de que non podías estar cómodo. Nese sentido estamos tranquilos".
Do CD Numancia, rival este domingo 22 de febreiro ás 12:00 (YouTube RC Deportivo) no campo Arsenio Iglesias, destaca que "é un equipo irregular, con bos xogadores. Non está a atopar o seu xogo pero ficharon xente en decembro. Están condicionados polas baixas. Era un equipo chamado para estar aí arriba que, se atopa esa regularidade, por nivel de xogadores pode estar aí arriba".
Así pois, pide "non mirar a clasificación e centrarnos en sacar os partidos porque a todos nos está custando. Calquera rival é difícil e se ten bos xogadores, a dificultade aumenta".
Finalmente, Manuel Pablo advirte que "os partidos están moi igualados pero non só para nós. A pasada semana a Gimnástica Segoviana tamén gañou ao final, hai dúas semanas o Oviedo Vetusta tamén ao final. Queda cada vez menos, os equipos tentan competir até o final e a dificultade aumenta. Nós temos que seguir nesa mesma liña. A ver se na parte ofensiva somos máis determinantes".
