Millene Cabral Vieira (Porto Alegre, Brasil, 29 de novembro de 1997) continuará un ano máis no Deportivo ABANCA, co que prorrogou o seu contrato até xuño de 2024.
A dianteira brasileira foi a máxima goleadora do Dépor ABANCA no curso 2022-23, con 13 goles, 10 en Primera Federación Iberdrola e 3 en Copa da Raíña. En total, participou en 32 partidos (24 como titular) dos 36 oficiais disputados por #asnosas este curso, nos que totalizou 2.214 minutos de xogo.
Millene chegou ao Dépor ABANCA o pasado verán procedente do Rayo Vallecano, equipo co que disputou 26 encontros (14 como titular) e marcou 3 goles na división de honra nacional.
Con anterioridade, Millene aterrou en España da man do Real Sporting de Gijón, co que se proclamou máxima goleadora de Reto Iberdrola na Temporada 2020-2021. A xogadora gaúcha anotou 16 goles en 22 encontros, 21 deles como titular.
Aos 17 anos, Millene incorporouse ao conxunto da universidade estadounidense Martin Methodist (agora University of Tennessee Southern), no que militou durante catro cursos. En 2019 xogou no Vegalta Sendai xaponés e no LA Galaxy norteamericano, antes de regresar ao seu país en 2020 para fichar polo Foz Cataratas FC.
Millene súmase ao cadro deportivista 2023-24 tralas renovacións de Lucía Alba, Henar Muiña e Cris Martínez durante o curso 2022-23, e as xogadoras con contrato en vigor: Inés Altamira, Paula Gutiérrez, Ainhoa Marín e Carlota Suárez.
