O RC Deportivo Business Club celebrou onte á noite un evento de gran éxito no emblemático Cinema Avenida, actual Espazo Avenida ABANCA, recentemente restaurado pola entidade. Trátase dun lugar histórico na Coruña que ofreceu o escenario perfecto para unha xornada de networking e colaboración empresarial.
Nesta ocasión reuníronse ao redor de 20 empresas, coa presenza de 70 invitados, incluíndo a varios membros do Consello de Administración do RC Deportivo, quen compartiron experiencias e estreitaron lazos nun ambiente único e de gran valor, explorando novas oportunidades de negocio e fortalecendo as relacións comerciais.
Durante o evento, Massimo Benassi, Conselleiro Delegado do Club, destacou que "é fundamental entender que o crecemento do RC Deportivo vai máis aló do deportivo. A evolución do noso Club ten un impacto directo na Coruña e en todo o tecido empresarial da cidade e de Galicia".
"O RC Deportivo está comprometido coa creación dun ecosistema empresarial robusto e dinámico que favoreza o crecemento de todas as empresas que forman parte do noso Club", subliñou a continuación.
Os asistentes tiveron a oportunidade conversar co Conselleiro Delegado branquiazul e tratar temas como a internacionalización do Club e a xeración de talento.
Posteriormente, os asistentes gozaron dunha dinámica de networking da man de Joaquín Sorribas, responsable do Departamento Psicoeducativo do Club e psicólogo do primeiro equipo masculino.
Ademais, houbo visita de xogadores e xogadoras dos primeiros equipos masculino e feminino, concretamente de Diego Villares, Dani Barcia, Eva Dios e Lucía Martínez.
O evento concluíu cun cóctel ambientado no cinema, onde os invitados puideron seguir compartindo experiencias, facendo contactos valiosos e fortalecendo as relacións nun ambiente relaxado e distendido.
A xornada reafirma o compromiso do RC Deportivo Business Club en promover espazos de diálogo e colaboración entre empresas e líderes do sector, destacando a importancia da innovación e as alianzas estratéxicas no desenvolvemento empresarial.