O Dépor ABANCA deixou escapar nos minutos finais dous puntos que serían case definitivos na loita polo ascenso, nun partido que dominaba por 2-0 no minuto 82 ante o CDF Osasuna Femenino e após coñecer a derrota do RCD Espanyol ante o SE AEM, que malia todo eleva de 3 a 4 puntos a vantaxe sobre o conxunto barcelonés.
O conxunto navarro presentouse en Abegondo coa firme intención de presionar alto ao Dépor ABANCA para impedirlle ter a pelota. Iso traduciuse nalgunhas chegadas e moitos saques de esquina visitantes e contadas pero claras ocasións branquiazuis no primeiro cuarto de hora.
Aos 6 minutos, Carmen lanzou unha falta directa rasa con moita intención. A pelota rozou nunha defensa coruñesa e foi a córner. No minuto 10, Ainhoa Marín dispuxo dunha dobre ocasión. O seu primeiro remate coa perna dereita sacouno baixo paus Aitana e o segundo, de cabeza, puido rexeitalo Josune sobre a mesma liña de gol.
Celia disparou de lonxe moi alto no minuto 13 e, dous minutos despois, chegou o 1-0. Centro de Ainhoa Marín desde a dereita ao corazón da área, onde Millene, libre de marca, cabeceou comodamente ao fondo das mallas. Foi o tanto número 12 da brasileira no que vai de campionato, o número 25 como deportivista, cos que iguala a Ainhoa Marín no oitavo posto do ranking histórico do Dépor ABANCA.
Á media hora de encontro, a colexiada canaria omitiu un claro penalti na área pamplonica. Vera zancadilleó por detrás a Ainhoa Marín cando ambas buscaban un balón en profundidade de ADT.
No minuto 37 produciuse un disparo afastado e desviado, á esquerda da portería navarra, de ADT. Só dous minutos máis tarde, o CDF Osasuna Femenino montou un veloz contragolpe con remate final duro pero alto de Yiyi. Alexia Jr., no minuto 41, inventouse un dereitazo desde o bordo da área que se foi preto do poste dereito da portería de Yohana.
O Dépor ABANCA puido ampliar a súa vantaxe no minuto 43, pero Raquel e Henar, completamente soas dentro da área, non se entenderon para controlar un balón colgado. Cando se cumpría o minuto 45, Yiyi disparou cruzado rozando o pau dereito da meta coruñesa.
Aos dez minutos da segunda metade, as deportivistas puideron aumentar a súa vantaxe nun centro de Lucía Martínez que Aitana, no seu intento de despexe para impedir o remate de ADT, desviou cara á súa propia portería o coiro, que se estrelou no poste esquerdo.
Non tardou, con todo, en chegar o 2-0. Foi no minuto 59, após gran combinación en ataque e un sensacional pase entre as dúas centrais de Paula Gutiérrez, que deixou a ADT man a man ante Maitane. A dianteira balear non perdoou para asinar o seu décimo tanto no que vai de campaña.
Durante moitos minutos, o partido discorreu sen accións perigosas en ningunha das dúas áreas. Todo parecía transcorrer plácidamente para o líder de Primera Federación Iberdrola ata que no minuto 80 Nahia Azpiazu cabeceou un córner que repeleu Yohana evitando o tanto osasunista. Nada puido facer a porteira branquiazul dous minutos despois, nunha acción de mala fortuna, cando Merche Izal controlou longo un centro dentro da área e Paula Novo, no seu intento de despexar a pelota, introduciuna na súa propia porta.
Ía cumprirse o minuto 90 cando o CDF Osasuna Femenino, após un contragolpe pola dereita que culminou Valero cun disparo en parábola desde fóra da área que superou por encima a Yohana, empataba o partido. Un auténtico xerro de auga fría en Abegondo, onde xa se celebraba o que era unha vantaxe case definitiva na loita polo ascenso a Liga F.
Con esta igualada, o Dépor ABANCA suma 48 puntos no máis alto da táboa, o que supón 4 de vantaxe sobre o RCD Espanyol, derrotado esta mesma mañá no seu campo polo SE AEM (1-2), cando restan 12 puntos por disputarse. O FC Barcelona B, que non pode ascender, é segundo con 45 puntos e podería recuperar o liderado se gaña esta tarde en campo do CD Alba Fundación Femenino.
Deportivo ABANCA: Yohana, Cris Martínez (Samara, min. 78), Paula Novo, Raquel García, Clara, Henar (Eva Dios, min. 67), Lucía Martínez, Paula Gutiérrez (Lía M., min. 88), Ainhoa Marín, Ana de Teresa e Millene (Carlota, min. 88).
CDF Osasuna Femenino: Maitane, Aitana, Vera, Josune (Miriam Rivas, min. 88), Saioa (Ari Sánchez, min. 66), Iara, Celia, Yiyi (Guallar, min. 78), Valero, Alexia Jr. (Merche Izal, min. 66) e Carmen (Nahia Azpiazu, min. 78).
Goles: 1-0 Millene (min. 15); 2-0 Ana de Teresa (min. 59); 2-1 Paula Novo, en propia meta (min. 82); 2-2 Valero (min. 90).
Árbitra: Ágata López García (c. Las Palmas). Cartón amarelo a Henar (min. 11), Valero (min. 33), Yiyi (min. 51), Clara (min. 85) e Maitane (min. 90+5).
Incidencias: partido correspondente á 22ª xornada de Primera Federación Iberdrola disputado na Cidade Deportiva de Abegondo.
