O Concello de Ames acolleu o martes 18 de xuño a presentación do DéporCampus Cabreiroá que terá lugar na localidade de Bertamiráns por oitava vez.
O consistorio, representado pola concelleira Susana Señorís e o técnico de deportes Alberto Viaño, reuniu a representantes de todos os clubs que organizarán actividades deportivas este verán. Rafael Budiño Rey, presidente do Bertamiráns FC; Joel Lodeiro Corzón, coordinador do Bertamiráns FC e do XII Campus BFC, e Juan Diego Rodríguez Rogido, director do Bertamiráns FC, acompañaron a Sergio Maurente, coordinador de programa local da Fundación RC Deportivo, na devandita presentación.
A actividade, que se estreou en 2016 pero non tivo lugar en 2020 debido á pandemia de COVID-19, desenvolverase entre os días 15 e 19 de xullo, en horario de 10:00 a 14:00. O campo municipal de Ames será o escenario dun campus destinado a nenos e nenas de entre 6 e 14 anos.
Os interesados poden consultar toda a información da sede de Bertamiráns, que xa completou a súa cota de inscricións, nesta ligazón.
Para calquera dúbida ou consulta coa súa inscrición, os interesados poden contactar directamente coa organización na dirección de correo electrónico deporcampus@rcdeportivo.es.
