O Deportivo ABANCA buscará mañá mércores 4 de novembro ás 16:00 horas na Cidade Deportiva Real Madrid de Valdebebas ante o Real Madrid a súa primeira vitoria nesta temporada na Primera Iberdrola.
Será un partido especial para o vestiario deportivista polo reencontro con Teresa Abelleira, ademais da tamén ex deportivista Misa. "Seguro que será unha sensación especial e diferente para todos nós. Teresa foi unha parte importante do noso equipo, do grupo. É unha persoa á que temos un agarimo enorme. Vai ser especial. É diferente vela con outro escudo enfrontándose a nós", admitiu onte Manu Sánchez en rolda de prensa.
O Deportivo ABANCA, coa canteirá Eva Dios, recupera para o choque a Carolina Arbeláez; pero seguen de baixa Cris, Kenni e Peke, esta con un cadro vírico e á espera de poder traballar xa co grupo os próximos días.
O adestrador branquiazul destacou ante os medios de comunicación o potencial do cadro merengue: "É un equipo súper reforzado. Logrou ás mellores xogadoras nacionais do país. É unha selección practicamente. Na miña opinión, sendo un equipo co escudo do Real Madrid, ten que optar ao título de liga".
O regreso á Coruña do equipo será após o partido, en voo con chegada ao Aeroporto da Coruña ás 21:00 horas.
O plan de viaxe do Deportivo ABANCA é o seguinte:
Martes 3 de novembro
17:00: Adestramento en Abegondo
21:40: Saída do voo do Aeroporto da Coruña con destino Madrid
23:00: Chegada aproximada ao Aeroporto de Madrid - Adolfo Suárez e traslado ao hotel Eurostars Madrid Congress
Mércores 4 de novembro
16:00: Real Madrid - Deportivo ABANCA, na Cidade Deportiva Real Madrid de Valdebebas
19:40: Saída do voo do Aeroporto de Madrid - Adolfo Suárez con destino ao Aeroporto da Coruña
21:00: Chegada aproximada ao Aeroporto da Coruña
