RCDeportivo RCDeportivo RCDeportivo
Skip to main content
RCDEPORTIVO

O RC Deportivo incorpora ao xornalista coruñés Manu Sainz como novo Director de Comunicación do Club

O RC Deportivo incorpora a Manu Sainz (A Coruña, 1972), un dos xornalistas referentes dentro do panorama deportivo nacional e internacional, como novo Director de Comunicación do Club.

Manu Sainz comezou a súa traxectoria profesional no xornalismo local, da man do diario Deporte Campeón, para anos máis tarde incorporarse á delegación do diario Marca na Coruña, onde chegou a alcanzar o cargo de delegado. En 2006, o diario madrileño recrutouno para a redacción central. Os últimos 18 anos, desenvolveu a súa traxectoria na capital de España. En 2009, o diario As reforzou o cadro coa súa estratéxica fichaxe, provocando un importante impacto mediático. Ademais da súa dilatada traxectoria nos dous diarios deportivos máis importantes do país, na actualidade tamén formaba parte do elenco de tertulianos do Chiringuito de Jugones, programa deportivo líder da televisión española. Tamén foi colaborador na Cadena SER, na Cadena COPE e na Axencia Reuters.

O xornalista galego e deportivista, completa a súa traxectoria profesional sendo socio fundador da Axencia Sport Media Manager, dedicada á comunicación integral de deportistas e entidades deportivas. O novo Director de Comunicación do club afirmou ao concretarse o seu nomeamento: "Como coruñés e deportivista, este é un dos días máis felices da miña carreira profesional. Os que me coñecen, saben a emoción que sinto nestes momentos. Asumo esta responsabilidade con enorme orgullo e lealdade a todo o que representa o RC Deportivo e nesta nova etapa". E engadiu entusiasmado: "Darei o mellor de min para estar á altura da grandeza que durante máis dun século construíu o Club do meu corazón. 'Aquí comeza outra historia' Forza Depor!"

Manu Sainz destacou na súa faceta como reporteiro. Foi enviado especial en tres Mundiais, unha Eurocopa e cubriu 17 edicións da Champions League, ademais doutros grandes eventos deportivos como as cerimonias de entrega do Balón de Oro, o Premio The Best ou a Bota de Oro, entre outros.  

Con esta incorporación, o RC Deportivo reforza a Dirección de Comunicación nun momento clave para o Club após o regreso ao fútbol profesional. Reafírmase así a estratexia de fortalecemento da estrutura interna da entidade.