O Xuvenil A desprázase mañá luns 6 de decembro a Israel para visitar ao Maccabi Haifa no partido de volta da segunda eliminatoria da UEFA Youth League previsto para o mércores 8 de decembro ás 16:00 no Sammy Ofer Stadium de Haifa.
Na ida disputada en ABANCA-RIAZOR o pasado 3 de novembro, ante máis de 12.000 persoas, o triunfo foi deportivista: 5-1. Toda Europa, asombrada, fíxose eco do ambiente excepcional que se viviu en #ANOSACASA durante os noventa minutos.
O equipo que prepara Manuel Pablo chega a esta nova cita europea após derrotar onte sábado na Grela 1 ao Ural Español CF (0-1), e a tres puntos de distancia do RC Celta no grupo 1º da División de Honra: 38 puntos suman os célticos por 35 os branquiazuis.
O Dépor viaxa con 18 futbolistas, entre os que se atopan xogadores habituais no Fabril e que xa apareceron no primeiro equipo en adestramentos e partidos, caso de Dani Barcia, Juan Rodríguez, Nájera ou Mella.
Na primeira eliminatoria europea, o Xuvenil A superou ao MKS PogoÅ Szczecin despois dunha noite máxica que emulou ás históricas do primeiro equipo na Champions League. Após caer 3-0 en Polonia de maneira inxusta e con dous goles no tempo de desconto de cada parte, ABANCA-RIAZOR e #ANOSAFORZA empuxaron a unha histórica remontada aos xuvenís branquiazuis: 4-0.
Máis plácido foi o pase do Maccabi Haifa ante o Zalgiris, campión de Lituania: 0-3 na ida disputada no LFF Stadium de Vilna e, con todo sentenciado, nova vitoria por 2-0 no Netanya Municipal Stadium da localidade israelí de Netanya, a medio camiño entre Tel Aviv e Haifa.
Nesta competición non existe a regra do valor dobre en campo contrario e, en caso de empate despois do tempo regulamentario non haberá prórroga e si lanzamento desde o punto de penalti.
En caso de superar esta rolda, o Xuvenil A accedería ao playoff que o emparellaría, a partido único o 8 ou 9 de de febreiro de 2022 en ABANCA-RIAZOR, cun equipo segundo clasificado dun dos oito grupos da Ruta Champions League.
O plan de viaxe do Xuvenil A é o seguinte:
Luns 6 de decembro
13:30: Saída do voo de Santiago con destino Madrid
17:00: Saída do voo de Madrid con destino Tel Aviv
22:45 (horario aproximado): Chegada a Tel Aviv e traslado ao Haifa Bayview Hotel en Haifa
Martes 7 de decembro
18:00: Sesión de adestramento na Cidade Deportiva do Maccabi Haifa
Mércores 8 de decembro
16:00: Maccabi Haifa - Xuvenil A, no Sammy Ofer Stadium de Haifa
Xoves 9 de decembro
6:00: Saída do voo de Tel Aviv con destino Madrid
11:40: Saída do voo de Madrid con destino Santiago
12:55: Chegada aproximada a Galicia
