Óscar Gilsanz: "O vestiario estaba amolado por non ser capaz de devolver todo o que nos dá ABANCA-RIAZOR"
Óscar Gilsanz insistiu na sala de prensa de ABANCA-RIAZOR que "non entendo o fútbol sen competir. Somos profesionais. O equipo, e sobre todo co ambiente que había fose de ABANCA-RIAZOR, a disposición era máxima".
Admite que cando non hai obxectivos, "o xogador é humano. Chegamos a este último arreón un pouco esixidos. Pero lonxe de crer que iso é negativo eu non estaría conforme co meu traballo se non esixise ao meu equipo o máximo e non chegásemos ao final esixidos no aspecto físico e mental".
Nesta liña, asegura que "este equipo é competitivo, demostrouno. Temos agora dúas semanas por diante nas que hai que traballar en Abegondo, encarar os partidos. Para min como adestrador e para todos os xogadores pór a camiseta do Dépor cada semana non fai falta máis aliciente, máis motivación que esa".
Óscar Gilsanz desvela que "o vestiario estaba amolado por non ser capaz de devolver todo o que nos dá ABANCA-RIAZOR. Era un día bo para iso. Víñanos un rival que sabiamos que ía ser moi complicado, unha das dous mellores cadros da categoría. Independentemente da súa clasificación agora mesmo ten futbolistas que o ano pasado estaban en Primera División pero o equipo cría, estaba convencido que podía facer un bo partido".
Lembra que "cando un equipo xoga un partido decisivo contra calquera rival o adestrador sempre ten menos influencia nesa motivación porque vai intrínseca no que está en xogo. Pero temos un equipo con moi bos profesionais, que traballa. Nestas dúas semanas imos traballar da mellor maneira, encarar a próxima fin de semana en Zaragoza para gañalo e seguir sendo competitivos, que é a mellor maneira de encarar cada momento no fútbol".
Do posible penalti a Villares que suporía a expulsión do defensor do Granada CF que o agarra, acción ademais que precedeu ao primeiro gol andaluz, o técnico deportivista apunta que "a culpa é de Villares porque é un tipo demasiado honrado. Foi o que lle dixen ao árbitro, se hai que tirarse, que avise. Se nunha falta, para que se vexa se impide finalizar a xogada, hai que tirarse que o digan. Hai pouca dúbida nesa xogada: un xogador man a man co porteiro non se aparta do balón por gusto".