Pablo Muñoz, na súa presentación: Toda a xente, todo o ambiente, todo o que move o Dépor é incrible

Pablo Muñoz Crespo (San Sebastián de los Reyes, Madrid, 4 de setembro de 2003) foi presentado esta mañá como novo xogador do Dépor, cun contrato até xuño de 2025.

En primeiro lugar, o novo futbolista madrileño pousou para os medios gráficos no campo principal de Abegondo, nunha rutina xa habitual nesta pretemporada coas novas incorporacións.

Xa na sala de prensa, Fernando Soriano, Director Deportivo do Club, subliñou que "vén en propiedade. Pode xogar de 8, 10, mesmo por fóra".

Pola súa banda, Pablo Muñoz, após debutar a pasada fin de semana en ABANCA-RIAZOR no partido ante o CD Teruel, asegura que "nunca estivera (en #ANOSACASA). Toda a xente, todo o ambiente, todo o que move o Dépor é incrible. Aquí vexo a #ANOSAFORZA unida ao equipo e iso é moi importante para alcanzar os obxectivos".

Confesa que "é a primeira vez que saio de casa. Desde o primeiro momento acolléronme súper ben os compañeiros, o adestrador e o corpo técnico. De momento todo moi ben".

O novo atacante deportivista explica que elixiu o Dépor porque "a opción me encaixaba moito. Un equipo que vai moito co meu estilo de xogo. Estou moi agradecido e darei todo por este equipo".

A pesar dos dous empates en ABANCA-RIAZOR nas dúas primeiras xornadas de liga, Pablo Muñoz indica que "seguimos coa ilusión de estar aí arriba. Tivemos resultados non desexados pero o equipo non recibiu ocasións. Estou seguro que en canto empecemos a funcionar van chegar os resultados".

Finalmente, preguntado pola actuación arbitral, comenta que "son temas que a nós non nos corresponden. Temos que dedicarnos ao noso, a xogar, a facelo o mellor posible. Para iso están os árbitros, para facer o seu traballo".