Paula Gutiérrez subliñou na sala de prensa do Dépor Training Center que o Dépor ABANCA "está con ganas de competir. Estamos a desexar saír desta dinámica e volver gañar. O bo que ten este deporte é que cada semana hai unha nova oportunidade".
Cualifica ao encontro deste domingo 25 de xaneiro ás 16:00 (Dazn) en Las Gaunas ante o DUX Logroño como "importante. O equipo está recuperado e con moitas ganas".
A centrocampista branquiazul advirte, ante a segunda saída consecutiva das Nosas, que "preferimos xogar en ABANCA-RIAZOR pero isto é a competición. Logo seremos nós as que xogaremos dous partidos seguidos en casa. Adaptámonos e dedicámonos a xogar, que é o que nos gusta".
Asegura que hai "tranquilidade" no equipo, con 8 puntos de vantaxe sobre o descenso, "pero non nos adoitamos fixar niso. Queremos mellorar o que fixemos o ano pasado. Aínda non tivemos esa boa serie pero estamos preto. Temos un potencial incrible dentro do vestiario e cada vez estamos máis preto de conseguilo".
Paula Gutiérrez admite que os partidos fóra de ABANCA-RIAZOR "é un punto de mellora esta temporada. Cada semana que imos fóra imos coa convicción de sacar os 3 puntos".
Finalmente a nivel individual atópase "ben na miña segunda temporada en Liga F aquí. O cambio de sistema a min persoalmente benefíciame moito. Atópome máis cómoda onde estou a xogar. Estou dispoñible onde Fran (Alonso) considere que me ten que pór. O importante é estar dispoñible, axudar e sumar sempre ao equipo".
