Raí Nascimento de Oliveira (Rio de Janeiro, Brasil, 18 de maio de 1998) adestrouse por primeira vez esta mañá cos seus novos compañeiros.
O atacante brasileiro asinou o seu contrato até final de temporada á primeira hora da mañá nas propias instalacións deportivistas, antes de baixar ao vestiario e incorporarse á dinámica de grupo.
Completou con normalidade todo o traballo, con só Uche e Héctor á marxe, ambos con adestramento específico entre o ximnasio e o céspede. Keko realizou xa unha parte co resto do equipo, co que o atacante madrileño entra na recta final da súa recuperación.
Após un quecemento supervisado polo preparador físico Julio Hernando, Rubén de la Barrera dispuxo un partido táctico a tres cuartas partes do campo 2, con tarefas como saída de balón, presión...
Finalmente, unha serie de partidos en espazo reducido, de alta intensidade e co cadro dividido en tres equipos, puxo o punto e final ao traballo sobre o céspede.
Hoxe mércores, os xuvenís Dani Barcia, Padín e o meta Adrián exercitáronse co Deportivo.
Mañá xoves haberá dobre quenda de adestramento: 11:00 en Abegondo e 17:30 a porta pechada en ABANCA-RIAZOR, escenario do partido deste domingo 31 de xaneiro ante Unionistas de Salamanca CF (19:00 horas, TVG), tamén sen público debido ás restricións derivadas da pandemia de COVID-19.
