O Fabril mídese este domingo 5 de abril ao Burgos CF Promesas a partir das 17:00 na Cidade Deportiva de Castañares.
O filial deportivista, que a pasada fin de semana derrotou no campo Arsenio Iglesias por 3-0 ao Atlético Astorga FC, é líder da categoría con 60 puntos por 53 do Oviedo Vetusta, 2º clasificado.
Manuel Pablo ten as baixas por lesión de Damián Canedo, Manu Ferreiro, Garrido, Pablo Cortés e Hugo Ríos, este con molestias no seu xeonllo dereito á espera de, esta semana, confirmar o seu tratamento de recuperación.
Ademais, Nájera cumprirá se segundo partido de sanción e Enrique Fernández tamén está castigado, neste caso por acumulación de cartóns.
O técnico fabrilista recupera a Vilela; poderá contar con Noé, que estivo en dinámica do primeiro equipo boa parte da semana; pero non con Bil, titular ante o Málaga CF en ABANCA-RIAZOR.
Manuel Pablo asegura que o seu cadro está "concentrado co que temos" e, nesta liña, lembra as baixas, "algunha de longa duración; pero o equipo sábese adaptar mantendo a nosa identidade".
Finalmente é consciente que aos seus xogadores, despois de moitas xornadas á fronte da liga, "non lles vou a quitar nin a ilusión nin as ganas. O corpo técnico témonos que centrar en que non decaia o ritmo nos adestramentos, en que nos partidos non nos desfondemos".
Pola súa banda, o Burgos CF Promesas, que a pasada fin de semana venceu por 0-2 ao CD Lealtad de Villaviciosa, é 16º na táboa con 29 puntos.
No partido da primeira volta disputado o 7 de setembro no campo Arsenio Iglesias venceu o Fabril por 3-0 con goles de Bil -2- e Nájera.
No seu campo de Castañares esta temporada o filial burgalés gañou ao Atlético Astorga FC (1-0), Marino de Luanco (1-0), Gimnástica Segoviana CF (3-0) e Bergantiños CF (1-0); empatou co UD Ourense (1-1), UP Langreo (1-1), CD Lealtad (2-2), UD Sámano (1-1), Real Valladolid Promesas (3-3) e Rayo Cantabria (4-4); e caeu co CD Numancia (0-1), SD Sarriana (0-2), Oviedo Vetusta (1-2) e Real Ávila CF (1-2).
