O ex capitán do Deportivo Manuel Pablo, agora integrante da Secretaría Técnica do Clube, dará unha charla hoxe martes ás 19.30 aos pais e nais dos xogadores do Alevín B, Benxamín A e Benxamín B. Será na sala de prensa da cidade deportiva de Abegondo.
O que fora lateral do Dépor durante 18 temporadas en Primeira e Segunda División, con 383 partidos disputados só en Liga, sen contarmos Copa do Rei, Champions League, Uefa e Intertoto, falará sobre a súa traxectoria como profesional e o papel que a súa familia desempeñou na súa carreira como xogador.
Esta actividade, que terá continuidade nas próximas semanas cos demais equipos da canteira, está organizada pola Área Educativa do Clube que coordina a psicóloga Marisol Arias Barja.
