O DÉPOR VISITA ESTE DOMINGO 24 DE MAIO ÁS 18:30 O REAL VALLADOLID PREPARADO PARA "SUFRIR O PARTIDO, PARA TRABALLALO, PARA PELEXALO AO MIL POR MIL"

O Dépor visita o Real Valladolid CF este domingo 24 de maio ás 18:30 (LaLiga TV Hypermotion) no penúltimo partido de LaLiga Hypermotion.Os resultados da última xornada, coa vitoria por 2-1 en ABANCA-RIAZOR fronte ao FC Andorra, deixaron a Os Nosos na 2ª posición con 74 puntos por 78 do Real Racing (1º) e 71 da UD Almería (3º). Así pois, un triunfo ante os pucelanos suporía o ascenso matemático.O equipo, como aconteceu en todos os partidos desta tempada por toda España, estará arroupado por máis dun milleiro de deportivistas nas bancadas do Estadio José Zorrilla. "O apoio de ANOSAFORZA é brutal. Sostennos nos momentos delicados, nos de sufrimento. Estou convencido de que iso vai pasar o domingo", afirma Antonio Hidalgo.O técnico deportivista insiste en que "hai que sufrir o partido, hai que traballalo, hai que pelexalo ao mil por mil. E nos momentos de dificultade ese apoio de ANOSAFORZA vainos dar ese plus de forza, de ánimo".Opina que "todo o que se está a mover é moi bonito pero a nosa realidade é un partido moi complicado contra un rival que nos vai poñer nas dificultades de calquera rival da categoría".Así pois, vaticina un partido que "se vai decidir por pequenos detalles e disto todos temos que ser conscientes".Antes de emprender rumbo a Valladolid por estrada, Os Nosos realizaron unha última sesión de adestramento no Dépor Training Center.Con David Mella á marxe do grupo, Bil, Noé e Samu son os canteiráns que se adestraron e que se desprazan co primeiro equipo, tal e como confirmou Antonio Hidalgo na rolda de prensa oficial.Tras unha activación, o corpo técnico dispuxo unha serie de partidos en espazo reducido, unha tarefa de finalizacións e un último repaso ás accións a balón parado.

Pola súa banda, o Real Valladolid CF, que a pasada fin de semana caeu en Santander (4-1), é 16º con 46 puntos, xa sen nada en xogo desde o punto de vista clasificatorio.No partido da primeira volta, disputado o 26 de outubro, houbo empate (1-1) cun tanto da igualada obra de Yeremay, de penalti no minuto 97.Na súa casa esta temporada o equipo blanquivioleta gañou ao AD Ceuta FC (3-0), UD Almería (3-1), Granada CF (2-1), SD Huesca (1-0), CD Leganés (3-2), Cádiz CF (3-0), Real Sociedad B (1-0) e Real Zaragoza (2-0); empatou co Córdoba CF (0-0), CD Mirandés (1-1), Málaga CF (1-1), Real Racing Club (1-1) e SD Eibar (0-0); e caeu coa Cultural Leonesa (0-1), Sporting de Gijón (2-3), UD Las Palmas (0-1), FC Andorra (0-1), Albacete Balompié (0-1), CD Castellón (0-4) e Burgos CF (0-1).Fran Escribá, técnico do Real Valladolid CF, lembra que "é o último partido diante da nosa xente. Non foi un ano de moitas alegrías. É verdade que nos últimos partidos estivemos ben na casa, sacamos bastantes partidos aquí na casa, moitos puntos. Quixeramos rematar ante un rival moi bo o mellor posible. Se lles podemos dar unha vitoria á nosa xente, mellor que mellor".Finalizado o partido, Os Nosos emprenden viaxe de regreso por estrada cara a A Coruña.