FRAN ALONSO: "SENTÍMONOS CON CONFIANZA, SENTÍMONOS BEN, COAS IDEAS CLARAS PERO NAS ÁREAS AÍNDA TEMOS MARXE DE MELLORA"

Fran Alonso manifestou este xoves 7 de maio na sala de prensa do Dépor Training Center que "o obxectivo é gañar os 3 partidos (ata o final de liga). Logo que se poida ou non... pero o noso plan nunca vai ser saír a empatar. Este ano xa nos pasou, por pecar de inxenuidade e en partidos igualados arriscamos, fomos a por elas e ao final nunha acción á contra gáñannos elas".Asegura que "gústanos ser valentes, gústanos asumir riscos, e ás veces sáenos ben e ás veces sáenos mal".Iso si, indica que "agora o único que importa é o Athletic Club".Precisamente do conxunto rojiblanco, rival este sábado 9 de maio ás 18:00 (Dazn) en Lezama, Fran Alonso destaca que "é un equipo que foi de menos a máis. Co cambio de adestrador levoulle tempo impor a súa metodoloxía. Agora está nun bo momento de forma. Hai xa bastante que empezou a sumar puntos".Por conseguinte, vaticina un partido "de máxima dificultade. A clave é estar un pouco máis acertadas nas áreas. Xa nos pasou contra o Alhama CF que parece que os rivais están moi inspirados nese ataque da área. E nós temos algunhas moi, moi claras e non estamos sendo capaces de metelas".O técnico deportivista desvela que durante a semana de traballo "estamos incidindo en ser algo máis precisas nas áreas porque no que pasa entre as áreas estamos moi ben. Defensiva e ofensivamente sentímonos con confianza, sentímonos ben, coas ideas claras pero nas áreas temos unha marxe de mellora".