O Fabril impúxose á UD Sámano este sábado 15 de novembro no campo de Vallegón, en partido correspondente á 11ª xornada no grupo 1º de Segunda Federación.
Con este resultado, o equipo de Manuel Pablo suma 23 puntos no primeiro posto, favorecido pola derrota do Oviedo Vetusta ante o UD Ourense; e á espera do que faga este domingo a Gimnástica Segoviana, que ten 21 puntos, na casa ante o UP Langreo.
Foron baixa para o partido Noé, Rubén, Mane e Enrique Fernández, este cunha escordadura no ligamento lateral interno nun xeonllo.
A maiores, Samu está co primeiro equipo en Córdoba.
Ambos os clubs cruzáronse recentemente posto que o pasado 30 de outubro, o primeiro equipo deportivista vencía por 1-4 aos cántabros na primeira rolda da Copa del Rey nun choque con dous fabrilistas no once inicial: Pablo García e Fabi. Nese encontro sentaron no banco do campo de Riomar de Castro Urdiales Hugo Ríos, Íker Vidal e Bil. Salvo Pablo García, todos eles titulares esta tarde.
A UD Sámano, que gañara os seus dous últimos encontros no seu campo ante o Real Valladolid Promesas e o Marino de Luanco, chegaba en 14ª posición con 9 puntos.
Empezou forte o Fabril, moi metido no partido, con dúas ocasións para Fabi, cun disparo lateral; e Bil, cuxo remate atallouno o porteiro Oleaga.
O filial deportivista levaba o peso do partido.
Así, no minuto 23, Bil cruza un balón dentro da área após recibir de Fabi.
O tanto deixou noqueado aos cántabros, que se marcharon do partido.
Bil puido repetir pouco despois e Nájera aumentou a distancia ao aproveitar Domínguez un erro na saída de balón da UD Sámano.
Aínda por riba, no minuto 40, de novo Domínguez asistiu a Nájera, que con frialdade coou o balón na portería local lonxe de Oleaga.
Con 0-3 e o encontro encarillado chegouse ao descanso.
Após o paso polos vestiarios, aos 60 segundos de xogo, Garrido aprovéitase dunha mala cesión dun defensor da UD Sámano a Oleaga para lograr o 4º a pracer.
Manuel Pablo empeza a mover o banco con todo visto para sentenza.
Aarón releva a Damián Canedo no 52. Pouco despois, no 67, Dipanda e Manu Ferreiro substitúen a Bil e a Fabi, dous dos futbolistas con máis minutos nas súas pernas.
O Fabril controlaba o encontro sen problemas a pesar da expulsión de Íker Vidal por dobre amarela no 70.
É máis, aínda aumentou a súa renda no marcador.
Hugo Torres conduce un contragolpe de manual e Mario Hermo marca sen oposición. Corría o minuto 83.
Con 0-5 chegouse ao final.
O vindeiro domingo 23 de novembro ás 18:00 (YouTube RC Deportivo) o Fabril recibe no campo Arsenio Iglesias á Gimnástica Segoviana CF.
UD Sámano: Hodei Oleaga, Aitor Abad, Acarregui (Álex Ochoa, min. 26), Jon López, Berzosa (Gilete, min. 60), César Girón, Unai Veiga (David Aguirre, min. 60), Lambea, Rasines, Diego Marta (Jonas, min. 69) e Pedro Méndez
Fabril: Hugo Ríos, Quique Teijo, Vilela, Damián Canedo (Aarón, min. 50), Íker Vidal, Garrido, Estévez (Mario Hermo, min. 73), Domínguez, Nájera (Hugo Torres, min. 73), Fabi (Manu Ferreiro, min. 67) e Bil (Dipanda, min. 67)
Árbitro: Sergio Fontecha Márquez, do comité vasco. Amoestou a Jon López (min. 3), César Girón (min. 17), Pedro Méndez (min. 49), Damián Canedo (min. 59), Lambea (min. 55), Íker Vidal (min. 56 e min. 68), Diego Marta (min. 65), David Aguirre (min. 69), Pedro Méndez (min. 79) e Rasines (min. 88). Ademais expulsou a Aitor Abad con vermella directa (min. 90) por unha entrada perigosa
Goles: 0-1 Bil (min. 23); 0-2 Nájera (min. 35); 0-3 Nájera (min. 40); 0-4 Garrido (min. 46); 0-5 Mario Hermo (min. 83)
Incidencias: partido disputado no campo de Vallegón
