Dani Barcia manifestou na sala de prensa de Abegondo que após o triunfo da pasada fin de semana en Mendizorrotza ante o CD Mirandés "estamos moi contentos pero temos que seguir nesta liña, seguir traballando. Só van 5 xornadas e hai que seguir nesta liña, traballando todos para conseguir os 3 puntos cada fin de semana".
Neste sentido pide "ir cada partido. Só levamos 5 xornadas. Quedan aínda moitas semanas. Temos que traballar cada fin de semana, estudar aos nosos rivais e dar o mellor de nós para tentar conseguir os 3 puntos".
Ante a SD Huesca este venres 19 de setembro ás 20:30 en ABANCA-RIAZOR recomenda "tranquilidade e confianza. Vai chegar o noso momento e vannos a chegar as ocasións. Co que temos arriba, co que estamos a traballar e coa ambición que estamos a ter imos conseguir os 3 puntos; pero temos que estar xuntos, unidos porque vai ser un partido moi difícil".
Recalca que esta temporada "a forma de traballar é distinta, fixemos bastantes fichaxes e os adestramentos son diferentes. Iso veunos ben. Cada un complementa aos seus compañeiros. Estamos a facer un bo traballo cada semana e hai que seguir así".
O futbolista coruñés tamén di que "temos un gran cadro e vese en cada adestramento a competitividade que hai. Non me gustaría estar na pel do míster. Iso tócao a el. Eu teño que facer o meu, facer o posible para poder xogar".
De Antonio Hidaldo opina precisamente que "é intenso. Nós temos que facer o que nos pida para que nos saian ben os partidos".
A nivel individual, e titular no once de Antonio Hidalgo, asegura que "tento facelo o mellor posible para facer un bo ano; e axudar ao equipo, se é no campo ben e se non tamén".
Finalmente o central deportivista afirma que a súa relación no campo con Loureiro, o seu compañeiro no centro da zaga, é boa: "Somos case familia. Con el lévome moi ben. Por tipo de xogo nos compenetramos moi ben. É un bo xogador, xa se viu na SD Huesca. E estanos dando moito". "As nosas avoas eran primas ou algo así. E xa o ano pasado cruzámonos varias veces na nosa aldea. Non tiñamos tanta relación como até agora pero é moi boa persoa e como xogador máis", engade.
