Davo, ao recoller o Premio Estrella Galicia de decembro, dixo que "o traballo duro e todo o que estamos a facer semana a semana está a dar os seus froitos" 

Antonio David Álvarez Rey 'Davo' (18 de decembro de 1994, Ourense) recolleu esta mañá na sala de prensa de Abegondo o Premio Estrella Galicia ao mellor xogador do pasado mes de decembro polas súas actuacións nos partidos de liga ante FC Barcelona B, Sestao River e CD Arenteiro; e CD Tenerife en Copa del Rey.

A terna de finalistas elixidos polos medios de comunicación que cobren a diario a información do equipo branquiazul foi a formada polo atacante asturiano de orixe ourensá, Diego Villares e o canteirán David Mella.

Na votación final, Davo foi o preferido ao lograr o 48% do apoio dos afeccionados, por 37% Mella e 15% Diego Villares.

En primeiro lugar, ante os medios de comunicación, quixo dar as grazas a #ANOSAFORZA e a Estrella Galicia "polo premio. Foi un ano no que o inicio non foi bo persoalmente para min e o poder dar a volta á situación tanto persoal como colectivamente é moi significativo".

Nesta liña, cre que "o mes de decembro foi un punto de inflexión en todos os aspectos para empezar a subir na táboa. O traballo duro e todo o que estamos a facer semana a semana está a dar os seus froitos".

A nivel persoal, Davo explica que "o míster sempre nos dá moita liberdade de movementos e eu son un xogador ao que lle gusta entrar por dentro, chegar a gol e as ocasións que caen por alí tentar aproveitalas ao máximo. Tiven a sorte este mes (de decembro) de poder meter eses 3 goles e a verdade que estou moi contento". "Tiven a sorte de estar no momento adecuado no sitio adecuado. Hai que aproveitar as ocasións ao máximo e a seguir traballando igual", engade.

Admite que "os goles en minutos finais de partido celébranse con máis ganas, con máis rabia"; e asegura ante o partido deste domingo 14 de xaneiro ás 18:00 (FEF TV) no Estadio Reino de León que "todos os puntos son importantes e nós sempre imos a por eles, así que imos ir a León como fomos a Arenteiro, como fomos a Barcelona, a por os 3 puntos".

Finalmente Davo confesa que no vestiario de Abegondo "somos conscientes que este mes é moi importante porque (Real Sociedad B, Cultural Leonesa, SD Ponferradina e Celta Fortuna) son equipos que pelexan polo mesmo que estás a pelexar ti. E todo o que sexa sumar 3 e restarlle 3 a eles meteriámosnos aí na pelexa agora polo primeiro posto, pero a nós gústanos ir partido a partido, gañar os 3 puntos todos os días. Esa é a idea que temos".