Unha tarefa de finalizacións e un exercicio táctico dirixido por Antonio Hidalgo no campo 2 foron as tarefas do Dépor no céspede este xoves 8 de xaneiro ante un partido que Mario Soriano cualificou como "duro" fronte á UD Las Palmas no Estadio Gran Canaria este sábado 10 de xaneiro ás 18:30 (17:30 hora local, LaLiga TV Hypermotion, GOL, TEN e Cayo TV)
O centrocampista madrileño lembrou que o choque ante o Cádiz CF do pasado domingo "foi para gañar. Escapóusenos en 2 accións moi evitables".
Os datos danlle a razón a esta opinión de Mario Soriano.
Cun 62% de posesión, ante os gaditanos foi o segundo partido con maior dominio de balón da temporada.
De feito, foi o 4º partido con maior elaboración ofensiva do curso, alcanzando unha media de 6,34 pases por acción ofensiva.
Así, o Dépor é o líder da liga en elaboración ofensiva, cunha media global de 5,46 pases por acción, a mellor do campionato.
Con todo o cadro sobre o céspede, Samu e Bil foron os representantes de #ANOSACANTEIRA na sesión desta mañá.
O RC Deportivo mantén a aposta polo talento novo. Por exemplo, o once inicial ante o Cádiz CF presentou unha media de idade de 25,1 anos.
Ao final do partido, a media reduciuse até os 23,7 anos, unha cifra que evidencia a confianza do corpo técnico nos futbolistas máis novos para afrontar diferentes momentos do encontro.
Nese tramo final xuntáronse no céspede Dani Barcia, Noubi, Mario Soriano, Yeremay, Patiño ou Bil.
Este venres, Os Nosos adiantan o horario do adestramento no Dépor Training Center ás 9:30 posto que nada máis concluír, o equipo viaxará a Las Palmas de Gran Canaria.