Germán: Se estamos concentrados en dar o noso máximo nivel cada fin de semana, cada adestramento e cada día, somos moi potentes
Germán Parreño asegurou este mediodía na sala de prensa de Abegondo que "tentamos centrarnos nos detalles de cada momento. Non temos marxe para facer as contas da leiteira. Se estamos concentrados en dar o noso máximo nivel cada fin de semana, cada adestramento e cada día, somos moi potentes. Sabémolo e centrámonos niso. Só miramos ao seguinte partido e así será queden os que queden".
Cre sobre o partido deste sábado 30 de marzo ás 16:00 na Cidade Deportiva Dani Jarque (FEF TV) que "hai que darlle moita importancia á UE Cornellà, un rival que nos puxo as cousas moi difíciles en ABANCA-RIAZOR. A semana pasada púxollas dificiles ao Barça. Ten bos xogadores, está moi ben traballado, poden xogar ao que queiran que son competitivos. É un rival serio, difícil, ante o que temos que estar con todos os sentidos moi metidos para sacar un bo resultado".
O meta deportivista alerta sobre os cataláns que "ao ser un equipo tan competitivo pódense adaptar a moitas cousas" e vaticina "un partido interesante, difícil e que nos van a pór as cousas complicadas. Temos que dar o 100% para sumar de 3".
Achaca os bos resultados do Dépor a "afrontar cada partido coma se fose unha final e houbo campos aos que habemos ir e sentímonos como en casa polo desprazamento que houbo, que é unha barbaridade".
Así, asegura que o vestiario non se para na clasificación e "centrámonos no noso traballo, nos detalles, sen pensar en canto nos queda. Dependemos de nós e é a mellor noticia. Se nos centramos en nós e damos o 100%, estaremos preto".
Finalmente, Germán Parreño opina sobre defender o liderado que "non temos nada. Só é unha cousa ficticia, unha posición na táboa, pero ata que non se acabe non hai nada".
