Jaime: O outro día saíu perfecto contra o líder e iso dános moita forza e confianza para afrontar os seguintes partidos

Jaime Sánchez subliñou esta mañá na sala de prensa de Abegondo que "necesitabamos" unha vitoria como a da pasada fin de semana en ABANCA-RIAZOR ante a SD Ponferradina: "Queriamos demostrar que queremos estar aí arriba, que podemos gañar a calquera. O outro día saíu perfecto contra o líder e iso dános moita forza e confianza para afrontar os seguintes partidos".

Lateral dereito ante a 'Ponfe' e mediocentro en varios partidos por exemplo no Reino de León, asume que "este ano me está tocando xogar en posicións que estou menos afeito, pero estou a disposición do equipo, do míster. El creu que tiña que xogar aí, eu encantado de sumar minutos e de axudar ao equipo".

Explica que durante a semana pasada "nalgún adestramento xoguei aí. Atopeime ben. É verdade que tamén o partido saíu perfecto, todo o equipo estivo moi ben, sentín moi arroupado nunha posición que non é a miña e estou contento porque saíu todo ben e gañamos, que ao final é é o máis importante".

Do partido deste domingo 28 de xaneiro ás 21:00 (TVG-2 e FEF TV) en Abanca-Balaídos ante o Celta Fortuna, o defensor branquiazul opina que é "un partido máis, moi importante porque queremos seguir sumando de 3, queremos estar aí arriba contra un gran rival tamén que está nos postos altos da clasificación; pero un partido máis e afrontámolo igual que a semana pasada".

Nesta liña, insiste en que "queremos darlle darlle continuidade a isto. Vimos de facer un grandísimo partido, pero sabemos que hai que seguir así, sacando de 3 porque queremos estar arriba e para iso hai que sumar de 3. É un partido como outro calquera moi importante, pero queremos confirmar que estamos nun bo momento".

Finalmente Jaime apunta do filial céltico que "é un equipo moi dinámico, ten xogadores moi bos, xogan moi ben e se teñen un partido bo vai ser difícil; pero confiamos nas nosas posibilidades, en todos nós e creo que podemos gañar perfectamente".