Lucas cualifica de marabilloso ABANCA-RIAZOR e Davo ve unha auténtica barbaridade o de ANOSAFORZA

Lucas Pérez e Davo pasáronse pola zona mixta de ABANCA-RIAZOR.

O capitán deportivista confesou que ao saltar ao campo "puxéronseme os pelos de punta. É incrible, marabilloso. Isto é o Deportivo, a xente, que estivo nas noites máxicas que vivimos todos, e agora que nos está tocando sufrir para levantar ao Club, e levalo onde queremos os que amamos este Club, que é ao fútbol profesional".

Asegura que veu ao Dépor "con moita ilusión desde o primeiro día na temporada 2014-15. Veño por un obxectivo claro que é axudar ao equipo da miña cidade e iso é o que son. Na primeira volta ía ao pau, fóra; agora estamos a ter a sorte de que entre, de gañar e de seguir na mesma liña".

Explicou que estas semanas estivo fóra do grupo por unha "escordadura de xeonllo. Hai escordaduras que che permiten volver antes ou máis tarde. Eu tentábao, a lesión non me permitía volver".

Lucas pediu "respecto para os Servizos Médicos deste Club que son marabillosos".

Pola súa banda, Davo, autor do tanto que certificou a vitoria do Dépor ante a Cultural Leonesa, opina que "é unha auténtica barbaridade o de #ANOSAFORZA. Non van parar de superarse. Á espera do que lle pase a Hugo Rama estou moi feliz polo resultado, do gol, da asistencia de Berto Cayarga e sobre todo do equipo que temos. No fútbol vívense máis momentos malos que bos e cando tocan bos hai que celebralo e ver a unión que hai no vestiario".

Admite que na primeira volta "a dinámica non era boa e soubemos darlle a volta grazas ao que temos no vestiario, que é unha unión moi grande, un ambiente espectacular. Iso agora estase notando".