Manuel Pablo desvelou na sala de prensa do Dépor Training Center que "no vestiario as caras despois do partido en Langreo (resolto con empate sen goles) non eran alegres. Preocupoume porque me pareceu que estabamos demasiado tristes para conseguir un empate".
O técnico fabrilista non oculta que "sempre queres gañar pero non sempre podes".
Admite que no Nuevo Ganzábal a pasada fin de semana "sufrimos co seu xogo directo. É algo que nos está pasando nalgunha situación. A partir de aí hai mellores. Ás veces en bloque baixo non cargamos moita a área, prevendo o que nos podemos atopar esta fin de semana", en alusión ao choque ante a UD Sámano deste sábado 24 de xaneiro ás 17:00 (YouTube RC Deportivo) no campo Arsenio Iglesias.
Do conxunto cántabro, Manuel Pablo explica que "están a xogar unha liña de 5 atrás. Apertan un pouco arriba pero logo métense nun bloque bastante baixo".
Ante isto, pedirá "ter paciencia, tentar movelos, ter un ritmo alto de pelota, saber cargar a área; e despois estar moi metidos no partido e non desesperarnos cando non atopemos espazos para ter situacións claras".
