O Dépor aumentou hoxe mércores o ritmo de traballo en Abegondo na súa segunda sesión semanal.
O cadro regresou ao traballo onte martes pola tarde despois do descanso do domingo e do luns. "Con vitorias como a do outro día (en Logroño) o descanso gózase máis. Son momentos para cargar pilas", subliñou esta mesma mañá Mikel Balenziaga na sala de prensa.
O veterano lateral, con 500 partidos oficiais ás súas costas, subliñou que "o sábado fixemos un gran partido, estamos moi contentos do que fixemos, do que levamos facendo, da dinámica que collemos; e agora é moi importante non saírse desa dinámica", en referencia ao encontro deste domingo 18 de febreiro ás 19:00 en ABANCA-RIAZOR ante a SD Tarazona (19:00, TVG-2 e FEF TV).
Por este motivo, o corpo técnico deportivista dispuxo esta mañá na Cidade Deportiva dun quecemento con rondos de presión, un xogo de posición e fútbol en espazo reducido, de alta intensidade.
Toda o equipo estivo sobre o céspede, ademais do canteirán Rubén López. Iso si, técnicos e Servizos Médicos non queren correr ningún tipo de risco e, por este motivo, Iván Barbero, que o pasado sábado en Logroño disputaba o seu primeiro partido de titular despois da súa lesión o pasado 16 de setembro en Salamanca, retirouse aos vestiarios antes do último exercicio.
Mañá xoves está previsto un novo adestramento a partir das 11:00 horas, con almorzo previo para os futbolistas ás 8:45.
