O Dépor, cuns 600 afeccionados branquiazuis na bancada, caeu por 2-1 co Sporting de Gijón en El Molinón nun clásico do norte con moito ambiente nas bancadas, emoción, frío en pleno mes de maio e choiva constante durante case os 90 minutos.
Con este resultado, Os Nosos quedan con 53 puntos na metade da táboa de LaLiga Hypermotion.
Coas baixas por lesión de Gauto, Dani Barcia, Mella, Ximo Navarro e Jose Ángel, este con unhas molestias na pube que os Servizos Médicos queren coidar, Óscar Gilsanz introduciu varios cambios respecto ao encontro do pasado domingo en ABANCA-RIAZOR ante o Albacete Balompié. Así, Diego Gómez entrou por Cristian Herrera e Denis Genreau polo citado Jose Ángel.
O primeiro achegamento con perigo do partido chegou aos 4 minutos. Nun saque de esquina lanzado ao primeiro pau o remate do atacante sportinguista pega en Jaime e o balón estrélase no pau dereito da meta de Helton Leite.
Respondeu ao minuto Yeremay cun disparo afastado demasiado alto desde fóra da área.
"Tiñamos claro que entrar no partido ben era fundamental. O Sporting aquí na súa casa e despois de dúas derrotas consecutivas quería sentir boas sensacións no inicio. Entón tiñamos que saír fortes. Cando tiñamos o balón caemos na estratexia do rival", apuntou Óscar Gilsanz na rolda de prensa.
Pablo Vázquez taponou o disparo de Juan Otero na área despois dunha veloz saída sportinguista.
O técnico deportivista apunta que "tivemos demasiadas perdas de balón por dentro e sufrimos nas contras. Nin soubemos facer ben as vixilancias nin soubemos cortar no inicio esas contras".
Así, Nico Serrano adiantou aos asturianos aos 16 minutos ao disparar cruzado na área após recibir de Gaspar noutra rápida transición local.
Con este tanto, o Sporting optou por deixar o balón ao Dépor e esperar a súa oportunidade acazapado.
Aos 23 minutos, Diego Gómez rouba un balón, mete na área a Eddahchouri, que cede a Yeremay entrando desde atrás pero o canario non precisou o seu disparo.
"Tentámonos refacer pero non tiñamos profundidade. O Sporting pechaba ben por dentro e cando chegabamos por fóra non tiñamos ningún tipo de profundidade", explicou o técnico deportivista.
A pesar de ser o Dépor o dominador da pelota, o Sporting aumentou a súa vantaxe no marcador ao fío do descanso. Gelabert mete un balón a Nacho Méndez ás costas da defensa, regatea a Helton Leite e marca a pracer o segundo da tarde.
Con este 2-0 chegouse ao descanso.
Após o paso polos vestiarios, Óscar Gilsanz dá entrada a Cristian Herrera e Barbero por Denis Genreau e Yeremay, que reportou na caseta molestias nos isquiotibiais. "Tentamos cambiar o plan de partido e metemos a dous dianteiros para xogar con máis centros laterais. Cando metes a dous dianteiros perdes a un xogador por dentro co cal a circulación é máis dificultosa. E non fomos capaces de ter moita abundancia de centros laterais. É certo que xeramos perigo cada vez que o faciamos", explicou o preparador branquiazul, hoxe dos amarelos.
Mario Soriano atrasou a súa posición no centro do campo e o canario situouse en banda.
Non obstante o primeiro disparo foi branquivermello. Rosas, desde fóra da área, estrelou o balón no pau da meta dereita de Helton Leite. A meta brasileiro logrou desviar o xusto a pelota.
No outro área, Cristian Herrera atopouse cun balón na área pero xutou demasiado cruzado totalmente só ante o meta Yáñez.
O Dépor recortou diferenzas por mediación de Barbero. O andaluz recibe en longo de Diego Gómez e adiántase ao porteiro asturiano, que quedou cravado baixo paus.
Nico Serrano tivo o 3-1 noutra transición rápida pero esta vez o seu disparo márchase moi alto.
De novo Nico Serrano rozou o gol libre de marca na área deportivista. Salvou Helton Leite.
No outro campo, Eddahchouri rematou forzado fose un centro raso ao corazón da área de Obrador, xusto antes de ser relevado por Escudero, que regresaba así aos terreos de xogo despois de superar a súa lesión no cóbado.
Escudero lanza un córner directo no 85 que saca Yáñez a córner con moitos apuros.
O partido era do Dépor. Cristian Herrera rematou fóra por moi pouco un bo centro de Escudero.
No entanto, Óscar Gilsanz apreciou "un pouco de precipitación, que nos impediu ter a calma suficiente para xerar algún perigo máis. Estivemos algo mellor pero non o suficiente", concluíu a súa visión dun partido que acabou en derrota pola mínima.
Sporting de Gijón: Yáñez, G. Rosas (Kevin, min. 87), Cote (Diego S., min. 68), Róber Pier, Gaspar (Pablo García, min. 68), Nacho Méndez, Olaetxea, Nikola Maras, Gelabert (Nacho Martín, min. 78), Juan Otero e Nico Serrano (Queipo, min. 78)
Deportivo: Helton Leite, Petxarroman, Pablo Vázquez, Jaime, Obrador (Escudero, min. 76), Genreau (Cristian Herrera, min. 46), Villares, Mario Soriano, Diego Gómez (Hugo Rama, min. 60), Yeremay (Barbero, min. 46) e Eddahchouri (Bouldini, min. 82)
Árbitro: Guzmán Mansilla, do comité andaluz. Amoestou a Yeremay (min. 45), Olaetxea (min. 45) e Gelabert (min. 76)
Goles: 1-0 Nico Serrano (min. 16); 2-0 Nacho Méndez (min. 44); 2-1 Barbero (min. 60)
Incidencias: partido correspondente á 39ª xornada en LaLiga Hypermotion disputado no Molinón ante 20.782 espectadores
