O Fabril volveu vencer este domingo 28 de setembro esta vez por 2-3 ao Rayo Cantabria, filial do Real Racing Club, no Municipal de La Planchada sito na localidade cántabra de Astillero.
O protagonista do encontro foi o dianteiro fabrilista Nsongo Bil (na foto de arquivo), autor dos 3 goles do seu equipo, o último no minuto 98.
Con esta vitoria, o filial encabeza a táboa unha xornada máis con 12 puntos, igualado co Real Ávila CF.
O partido arrincou da peor maneira. Ao minuto de xogo, Diego Fuentes mete en profundidade a Izan que bate no man a man a Hugo Ríos.
O Fabril, lonxe de acusar o golpe, reaccionou rápido. Bil transforma no minuto 9 enganando ao porteiro Laro unha pena máxima cometida sobre el mesmo.
O dianteiro fabrilista xa puido igualar minutos antes grazas a unha cabezada a un centro desde a banda dereita.
O filial branquiazul comezou a pór en apertos ao Rayo Cantabria co trío Fabián-Bil-Nájera aínda que os cántabros tamén creaban perigo.
Con empate nun partido de ida e volta nas dúas áreas chegouse ao descanso.
Após o paso polos vestiarios, o encontro seguiu coa mesma tónica. Un ida e volta nas dúas porterías e o marcador aberto.
No minuto 71 adiántase o Rayo Cantabria. Diego Fuentes regatea ao seu par e xuta raso axustado ao pau esquerdo. Hugo Ríos non pode evitar o tanto.
Manuel Pablo mete no campo a toda a súa artillaría, empezando por Pablo Cortés e Domínguez.
Pero foi Bil o que igualou no minuto 79. O camerunés aprovéitase dun fallo no despexe de Axel para superar a Laro no un contra un.
Con táboas de novo o Fabril resolveu o encontro no desconto. Nun centro lateral o balón pega no brazo dun defensor rayista e o colexiado do partido, o asturiano Álvaro Sahelices, sinalou pena máxima.
Bil non fallou e os 3 puntos veñen para Abegondo.
A próxima fin de semana, o Fabril volve xogar fóra de casa, concretamente o sábado 4 de outubro ás 17:30 en Astorga.
Raio Cantabria: Laro, Argos, Axel, Cagigal (Ekain, min. 46), Samu C. (Diego Rosado, min. 84), Manu G., Vallecillo, Diego Fuentes (Manu Márquez, min. 77), Izan, Santi Franco (Diego Díaz, min. 56) e Rodri Ramos (Baldrich, min. 56)
Fabril: Hugo Ríos, Pablo García (Quique Teijo, min. 67), Samu, Damián Canedo, Íker Vidal, Kike, Noé (Garrido, min. 84), Nájera (Domínguez, min. 84), Fabi (Pablo Cortés, min. 78), Mane (Dipanda, min. 67) e Bil
Árbitro: Álvaro Sahelices, do comité asturiano. Amoestou a Cagigal (min. 14), Axel (min. 16), Bil (min. 41), Vallecillo (min. 43), Laro (min. 50), Noé (min. 55), Diego Rosado (min. 87), Izan (min. 90), Ekain (min. 90) e Brais Suárez (min. 90)
Goles: 1-0 Izan (min. 1); 1-1 Bil, de penalti (min. 9); 2-1 Diego Fuentes (min. 71); 2-2 Bil (min. 79); 2-3 Bil, de penalti (min. 90+8)
Incidencias: partido disputado no Municipal de La Planchada na localidade de Astillero
