Os Nosos gozan uns días fóra da competición con motivo do parón do Nadal en LaLiga Hypermotion.
É tempo de descansar; desconectar; estar coa familia, en moitos casos a miles de quilómetros de distancia da Coruña; recargar pilas; pero tamén para seguir traballando.
Cada futbolista levou na súa mochila un plan específico de adestramento deseñado pola área Condicional do RC Deportivo supervisada polo preparador físico Roberto Cabellud.
Os obxectivos marcados son manter o nivel físico, evitar lesións, manter niveis de forza, fomentar a recuperación mental, controlar a alimentación e respectar o coidado persoal.
Antonio Hidalgo citou aos seus futbolistas de novo no Dépor Training Center o luns 29 de decembro ás 17:00 horas para retomar a competición, cuxo primeiro partido en 2026 está fixado o domingo 4 de xaneiro ás 21:00 (LaLiga TV Hypermotion e Fútbol 2, dispoñible tamén en DIGI TV e outras plataformas) ante o Cádiz CF en ABANCA-RIAZOR.
