Óscar Gilsanz advirte que "quedan 6 xornadas, 18 puntos, moitas cousas en xogo"

Óscar Gilsanz subliñou na sala de prensa de ABANCA-RIAZOR ao concluír o encontro ante o CD Tenerife e alcanzar os 50 puntos que "quedan 6 xornadas, 18 puntos, moitas cousas en xogo".

Aprecia unha Liga Hypermotion "extremadamente igualada. Hai moitos empates, moitos partidos que se deciden por pequenos detalles. E nós temos que seguir traballando niso".

Nesta liña, pide o técnico deportivista "seguir construíndo un equipo forte. Levamos unha boa serie de resultados en canto a non perder, en canto a ir sumando cada semana. Para esta categoría este tipo de xeiras é difícil de encadear".

Cre que "lle estamos tamén dando estabilidade a encaixar pouco. Na segunda volta somos, con outros 2 ou 3 equipos, os menos goleados. A partir de aí crecer nesa estabilidade para que os nosos xogadores de ataque con desequilibrio no un contra un estean máis liberados".