O Dépor ensaiou este mércores no campo 2 do Dépor Training Center o plan para, segundo afirmou Mario Soriano, "facer o partido que queremos en Ceuta", este sábado 14 de marzo ás 21:00 horas (LaLiga TV Hypermotion).
Antonio Hidalgo dispuxo, após unha activación, un xogo de posición, un exercicio táctico e un partido.
"Estamos a tratar de traballar e de mellorar eses aspectos que nos últimos partidos está a custarnos máis", explicou o centrocampista branquiazul após recoller o Premio Estrella ao mellor xogador do mes de febreiro.
Yeremay fai tarefas co grupo e outras co readaptador Nando Rodríguez; mentres que Mella, confirmado o edema óseo no seu xeonllo esquerdo, está con adestramento personalizado.
Dos dous canteiráns Mario Soriano manifestou que "están a traballar para volver canto antes co equipo; pero os cadros somos 25 xogadores e todos están preparados".
Hugo Ríos, Bil, Noé e Mane foron os representantes de #ANOSACANTEIRA.
Este xoves, o Dépor adestrarase de novo a partir das 10:30 no Dépor Training Center.
