Óscar Gilsanz asegurou en rolda de prensa que "o calendario para nós chega até mañá. É dicir, mañá (en Vilalba) temos un partido importante e despois volveremos xogar aquí en Abegondo contra outro rival, pero imos ir paso a paso, día a día. É certo que o calendario o sabemos, que todo o mundo acaba mirando o calendario, pero temos claro que para todos os rivais, os que están a pelexar por ascender ou os que están a velar por saír dos postos de descenso, sempre pór o foco no rival que che toca é a maneira máis intelixente e máis adecuada de encarar cada partido".
Cualificou o choque de mañá sábado 9 de decembro na Magdalena (16:45) ante o Racing Villalbés como "importante. Todos os partidos o son e sobre todo cando se vai achegando o final de temporada toman un cariz importante en canto a que os puntos acheganche ou che afastan do obxectivo cando estás preto do final".
Despois de varias temporadas no banco lucense, o técnico fabrilista admite que é un encontro especial: "Sempre ir a un sitio onde tratáronche ben e onde te sentiches como en casa para min é unha satisfacción".
Cre que o triunfo do filial branquiazul en Zamora a pasada fin de semana supón "unha dose importante de confianza, de moral, de alegría mesmo para o vestiario. Hai 2 anos por esas mesmas datas gañou o Dépor, o noso primeiro equipo, alí por 0-1, tamén no minuto 92, cun gol de Alberto Quiles. Quere dicir a dificultade que ten facelo nese campo e o que supón de personalidade para os xogadores, para o equipo, repornos dun mal inicio con gol en contra incluído, ser capaces primeiro de igualar o partido no xogo, despois de igualalo no marcador e acabar gañando, evidentemente é unha boa dose de confianza para os xogadores e, sobre todo, unha demostración de personalidade do equipo".
Do Racing Villalbés apunta que "leva unha mala serie porque non é capaz de marcar gol e estalle restando puntuación. Pero tamén é un equipo que perde moi pouco. Dos 5 últimos partidos en casa leva unha derrota. Alí non gañou nin Pontevedra CF, nin Zamora CF, Ourense CF, SD Compostela, Real Avilés Industrial...", subliñou.
