Os Nosos completaron esta mañá no campo 3 de Abegondo a habitual sesión pospartido antes da xornada de descanso prevista para este martes 26 de agosto.
Diego Villares, onte na zona mixta de ABANCA-RIAZOR, lembrou que "nos quedan 40 partidos e imos aos poucos". "Quédanos moito", engadiu.
Os xogadores que foron titulares onte domingo ante o Burgos CF tiveron unha xornada de recuperación e só saltaron ao céspede para realizar co grupo a activación e uns rondos.
Para os demais, houbo unha xornada de alta intensidade, cun exercicio de finalizacións e fútbol reducido.
A novidade foi a presenza do extremo fabrilista Alioune Badara Mane (Senegal, 10 de febreiro de 2003), citado por primeira vez para adestrar co primeiro equipo.
Jose Ángel é o único futbolista do primeiro cadro que está con adestramento personalizado.
Antonio Hidalgo citou de novo aos seus futbolistas o mércores 27 de agosto para almorzar xa na instalación e saltar ao céspede a partir das 10:30 horas.