Juan Diego Molina Martínez (San Roque, Cádiz, 5 de novembro de 1993), coñecido no mundo do fútbol como Stoichkov, foi presentado este mediodía como novo xogador do RC Deportivo para a temporada 2025-26 cedido polo Granada CF con opción de compra non obrigatoria.
Fernando Soriano apuntou que "pode xogar na punta como en calquera das 3 zonas detrás da punta. Ten moito gol, capacidade de xogar ao pé e en ruptura. Dános unha gran variedade dentro do xogo para que poida elixir o adestrador".
Pola súa banda, Stoichkov afirmou que a súa chegada foi "moi rápida. Todo se produciu en 1 día. Pola mañá estaba a adestrar alí en Granada e pola tarde estaba a viaxar para aquí. Cando xurdiu a oportunidade o meu representante comunicoumo. Vendo como xoga o equipo e as características gustoume moito a idea e non mo pensei moito".
O novo atacante do Dépor promete "tentar achegar ao equipo o máximo posible con traballo e con gol".
Advirte que "onde máis rendín foi preto do dianteiro, de mediapunta. Pero pódome adaptar a calquera posición. Tentarei o que me pida o míster acatalo da mellor maneira e onde me toque xogar".
Stoichkov opina que no Dépor "hai un bo cadro. Tentarei gañarme o posto como en todos os lados nos que estiven pero sabendo da dificultade polos xogadores que hai. Eu traballo o día a día para dar o máximo de min e logo decide o míster".
Finalmente o futbolista branquiazul admitiu que "unha das cousas que me incitou a vir foi o cadro, os xogadores que hai"; e do partido deste sábado 13 de setembro ás 16:15 en Mendizorroza ante o CD Mirandés afirma que "é un rival moi novo, que o ano pasado fíxoo moi ben. Este ano viñeron novos xogadores. Espérome un partido que nos vai a custar moito. Mendizorroza coñézoo ben. Estiven hai pouco alí. Moi contento de volver alí".