Vera Martínez, que xogou os seus primeiros minutos en Liga F o pasado domingo no Estadio Alfredo Di Stéfano, manifestou na sala de prensa de Abegondo que "gozou moito poder volver ao campo coas miñas compañeiras e de saber que a perna responde ben. É un momento para min feliz a nivel individual e estou contenta de poder volver para axudar".
Precisamente do encontro ante o Real Madrid CF pide "aprender dos erros que cometemos. Non foi o noso mellor partido pero somos un equipo capaz de sobrepornos a todas estas cousas e xa poder empezar a traballar corrixindo todos eses erros para ir a por o seguinte", en referencia ao partido ante o Madrid CFF deste domingo 28 de setembro ás 16:00 (Dazn) en ABANCA-RIAZOR.
A defensora deportivista opina que o inicio de liga do Dépor ABANCA "foi positivo. Foron 2 empates, 1 vitoria e agora contra o Real Madrid CF déusenos así; pero o equipo está a traballar dunha forma moi boa. Estamos a crecer, no camiño do que buscamos".
Pensa que esta campaña, a diferenza da pasada, "coñeces a liga, coñeces aos teus rivais e viñeron xogadoras con experiencia que dan un plus ao equipo. En resumo, somos un Dépor ABANCA máis maduro, con coñecemento da liga, e con ganas de traballar e superar o do ano pasado".
Vera subliña a palabra "gozar. Creo que é a palabra. Se gozamos, todo vai saír só, os resultados daranse e terminará sendo un ano positivo".
Finalmente, apunta que en defensa "somos un equipo máis traballado. Iso dá solidez ao equipo. Cando tes ese bloque ben formado partes dunha base moi sólida para poder despois atacar. Poder recibir poucos goles ou ningún vai facer que puntuemos en todos os partidos".
