Antonio Hidalgo subiu o ritmo do Dépor nunha fría e asollada mañá no Dépor Training Center.
O técnico deportivista dispuxo, após unha activación, un circuíto físico con duelos e finalizacións; un exercicio táctico; e fútbol en espazo reducido, de alta intensidade, para concluír.
A novidade foi a presenza xa co grupo de Adrià Altimira. Concretado a súa fichaxe até 2028, o novo lateral deportivista completou a sesión con total normalidade.
En rolda de prensa con motivo da presentación de Álvaro Ferllo, Fernando Soriano, Director de Fútbol, explica que "coa lesión de Ximo Navarro era a posición (lateral dereito) que menos cuberta tiñamos. Tanto Loureiro como Lucas fixérono ben pero coa lesión de Escudero estabamos máis coxos en defensa. Na semana que máis baixas tiñamos veu a lesión de Damián Canedo e a saída de Samu á selección privounos de poder contar con eles".
Insiste na longa recta final da competición en "estar o máis protexido posible e era unha posición na que tiñamos que reforzar".
Confesa Fernando Soriano que a "Alti viñámolo seguindo anos anteriores. Sabiamos da posibilidade da súa saída en Villarreal. Viamos que podía ser unha opción moi real. Traballouse desde hai semanas e por iso tentouse facer canto antes".
Lembra que o mes de xaneiro é "moi esixente con 4 partidos de liga e 1 de Copa del Rey. Queriamos que o adestrador tivese as máximas opcións posibles canto antes".
Tanto Altimira como Álvaro Ferllo "están preparados para xogar" xa o domingo 4 de xaneiro ás 21:00 horas en ABANCA-RIAZOR ante o Cádiz CF. "Non están aínda inscritos porque o mercado non se abre até o día 2 pero está toda a documentación preparada para que no momento no que se abra inscribir e poder estar a disposición do adestrador", engadiu o Director de Fútbol branquiazul.
Escudero fixo unha parte co resto dos seus compañeiros; mentres que Samu, Bil e Noé foron os representantes de #ANOSACANTEIRA.
Sobre Ximo Navarro, que xa se adestra co grupo desde hai unhas semanas, Fernando Soriano afirma que está "na recta final da súa recuperación".
O Dépor despide 2025 cun novo adestramento este mércores 31 de decembro a partir das 10:30 no Dépor Training Center.