ABANCA-RIAZOR HOMENAXEA ESTE DOMINGO 17 A CRIS MARTÍNEZ, QUE SE RETIRA AO REMATAR A TEMPORADA "COA CERTEZA DE QUE O RC DEPORTIVO VAI SEGUIR ESTANDO NO MEU CORAZÓN"

ABANCA-RIAZOR vivirá un momento especial, deses que quedan gravados na retina do deportivismo, este domingo 17 de maio no descanso do encontro entre o Dépor e o FC Andorra.ANOSAFORZA ten a oportunidade de despedir como se merece a Cris Martínez, a gran capitá do Dépor ABANCA, que se retira do fútbol cando remate esta temporada. E faino no equipo da súa vida e do seu corazón.Deixa atrás 221 partidos desde a temporada 2016-17, campaña na que volveu nacer o equipo feminino deportivista.A futbolista astorgana foi titular no primeiro partido de liga do Dépor ABANCA e protagonista nos dous ascensos á máxima categoría do fútbol feminino."O Dépor para min significa o meu fogar. Foi a miña casa durante moitos anos", afirma sentada no centro do campo de ABANCA-RIAZOR, coa Torre de Marathón ás súas costas.

No seu palmarés figuran ademais 4 trofeos Teresa Herrera.Confesa "ter sentido que pertencía a unha familia moi grande porque hai moita xente detrás que che demostra cada día o que significa un club así. Foi como formar parte de algo moi grande".Despois de ser nai, retírase do fútbol "por unha razón moi grande" e, entre bágoas, asegura que "nunca deixarei de ser e de pertencer a este Club aínda que deixe de estar na herba".Hai despedidas que nunca serán un adeus definitivo, porque quen deixa pegada permanece para sempre na memoria dun club e da súa xente.

Cris Martínez pon fin a unha etapa inesquecible sobre o céspede. Anos de esforzo, compromiso, sacrificio e paixón por este deporte que tantas alegrías nos regalou xunto a ela."Foron 10 anos nos que gocei moitísimo. Tiveron os seus momentos bos e os seus momentos malos pero de todos se aprende", recalca.

Máis alá dos partidos, quedará o exemplo dunha futbolista que defendeu cada balón co corazón e que representou os nosos valores dentro e fóra do campo.Cris Martínez está "orgullosa por ter defendido unhas cores que significan tanto para tanta xente. Marcho coa certeza de que este Club vai seguir estando no meu corazón".