O Fabril empatou (0-0) co Bergantiños CF este domingo 9 de novembro no campo Arsenio Iglesias na 10ª xornada no grupo 1º de Segunda Federación.
Manuel Pablo viu un partido "moi competido, con poucas situacións de gol, moi táctico, moi pechados os dous equipos".
Con este resultado, o conxunto fabrilista suma 20 puntos na 3ª posición da clasificación.
O técnico branquiazul valora que "polo menos vin a un Fabril que presionou forte adiante, estivo conxuntado, non tivo ansiedade porque nos últimos partidos as vitorias levábannos a que se non gañabamos era un drama cando hai partidos que non se poden gañar".
O filial recuperou este domingo a futbolistas como Manu Ferreiro e Hugo Torres, que arrincaron o choque no banco.
Ademais foron titulares Samu, após cumprir un partido de sanción no encontro ante a UD Ourense; Damián Canedo, ás ordes de Antonio Hidalgo en Zaragoza a pasada fin de semana; ou Fabi, Hugo Ríos e Bil, en dinámica do primeiro equipo habitualmente.
Por contra causaron baixa Noé, Mane, Rubén e Aarón.
Ambos os equipos víronse as caras esta pasada pretemporada, concretamente o sábado 30 de agosto, no mesmo escenario que o deste domingo. Naquela ocasión venceron os fabrilistas por 1-0 con gol de Bil aos 2 minutos de partido.
Saíu o Bergantiños, un punto por detrás na táboa, cunha presión alta.
Os rojillos obrigaron ao Fabril a defender por momentos en campo propio e esperar unha opción á contra.
A primeira opción do filial foi a balón parado. Nájera lanza un saque de esquina ao corazón da área e o balón paséase pola portería do Bergantiños.
No outro área, pasada a media hora, Miguel Peña probou fortuna cun remate que se vai ás mans de Hugo Ríos.
Ao bordo do descanso, Iago Novo empalma un balón desde moi lonxe ás mans de Ríos.
A última para o Fabril na primeira metade foi unha transición de Pablo García que cedeu a Nájera pero o centro do atacante fabrilista non atopou rematador.
Após o paso polos vestiarios deu un paso adiante o filial.
Aos 63 minutos, Bil fíxose un oco entre varios defensores do Bergan e o seu disparo, raso, acabou nas mans do gardameta Santi Canedo.
Un minuto máis tarde, Nájera proba fortuna desde a frontal da área. Santi Canedo despexa como pode un balón que lle botou xusto diante.
Respondeu Marru cun potente chute que se marcha fóra por pouco.
Domínguez, aos 71 minutos, obriga a intervir a Santi Canedo cun disparo raso axustado ao pau esquerdo.
Seguiu o Fabril empuxando. Manu Ferreiro, que volvía xogar superada a súa lesión muscular, xutou tamén ás mans do porteiro do Bergantiños CF.
A mellor oportunidade do partido foi para Quique Teijo, que relevou a Pablo García no minuto 82. O lateral deportivista márchase do seu par e dispara ao pau da portería do visitante. Corría o minuto 87.
E xa no desconto, Domínguez volveu disparar raso ás mans de Santi Canedo.
"Acabamos preto da súa área pero estaban ben replegados e mesmo nalgunha situación corréronnos. Non tivemos profundidade porque defendían moitos e moi atrás e custou", resumiu Manuel Pablo.
O vindeiro sábado 15 de novembro, a Fabril visita á UD Sámano ás 17:00 no campo de Vallegón.
Fabril: Hugo Ríos, Pablo García (Quique Teijo, min. 82), Damián Canedo, Samu, Íker Vidal, Garrido, Enrique (Dani Estévez, min. 67), Nájera (Manu Ferreiro, min. 74), Fabi (Héctor Areosa, min. 67), Domínguez e Bil (Dipanda, min. 82)
Bergantiños CF: Santi Canedo, Miguel Peña, Sola, Fito, Marru, Álex Pérez (Daniel, min. 57), Darío Germil (Isma Cerro, min. 74), Iago Novo, Diego (Koke, min. 57), Nacho Pastor e Tass
Árbitro: Daniel Pastoriza, do comité galego. Amoestou a Miguel (min. 36), Nacho Pastor (min. 74), Dani Estévez (min. 85) e Dipanda (min. 90)
Incidencias: partido correspondente á 10ª xornada no grupo 1º de Segunda Federación disputado no campo Arsenio Iglesias
