Nesta segunda semana consecutiva sen liga a consecuencia dos compromisos das seleccións nacionais, o Dépor ABANCA afronta un partido de adestramento.
Será este venres 6 de marzo ás 16:00 na cidade deportiva do Requexón ante o Real Oviedo.
O conxunto carbayón pecha actualmente a clasificación en Primera Federación FutFem.
Fran Alonso non pode contar coas internacionais Inês Pereira, Marisa e Espe Pizarro.
A que regresou á Coruña da concentración de Venezuela foi Michi Apóstol, pero cunha fractura de clavícula que lle obrigará a pasar polo quirófano do Hospital Quirónsalud A Coruña.
Tampouco viaxarán a Oviedo as canteirás que están en dinámica do primeiro equipo: Lucía Rivas, Redru e Carmen Carballada.
Todas elas adéstranse estes días co filial e competirán esta fin de semana en Segunda Federación.
Por contra, viaxa co grupo Hildah Magaia, a internacional surafricana que podería ter os seus primeiros minutos como xogadora do Dépor ABANCA.
Paula Monteagudo, na sala de prensa do Dépor Training Center, subliñou após a súa renovación até xuño de 2027 que "ás futbolistas sempre nos gusta a competición pero paróns así veñen ben para desconectar un pouco e para meter máis traballo físico".
A capitá Cris Martínez, que arrincou o seu plan de readaptación física após a súa maternidade, será outra das baixas en Oviedo.
O conxunto asturiano confirmou que a entrada ao partido custa 5 euros e os menores de 12 anos teñen acceso gratuíto.