Riki e Altimira pasáronse pola zona mixta de ABANCA-RIAZOR finalizado o choque ante o Granada CF.
O centrocampista asturiano admite que "non estivemos nada ben. O vestiario está bastante amolado. Sabiamos da oportunidade que tiñamos de meternos arriba. Non queda outra que corrixir, analizar os erros que tivemos e ir a Ceuta a gañar" (o vindeiro sábado 14 de marzo ás 21:00 horas no Estadio Alfonso Murube).
Opina que "na primeira parte ameazamos pouco esa liña de 5 que tiñan. Viñamos bastante ao pé, encima en zonas onde eles estaban cómodos para presionar. Na segunda parte a raiz do gol que meten estivemos precipitados, ansiosos. Púidonos un pouco a situación".
Finalmente Riki advirte que "todo o mundo quere estar arriba, quere gañar cada domingo. Esas ganas que temos todos, #ANOSAFORZA, nós, vós (polos medios de comunicación) fainos caer nesa precipitación. É máis ganas que presión".
Pola súa banda, Altimira confesou que "nos imos con mal sabor de boca. Non foi un dos nosos mellores partidos tanto ofensiva como defensivamente. Tentámolo até o final, e aínda que sexa moi duro e perdésemos unha oportunidade moi importante isto é moi longo. Queda moito e hai que seguir traballando".
Lembra que ante o Granada CF "tivemos algún achegamento pero non estivemos do todo fluídos".
Finalmente pide a #ANOSAFORZA "que sigan crendo. Tentámolo até o final. Non estivemos nada acertados, iso está claro"; e sostén que "é moi necesario o apoio da afección de aquí a final de temporada".
