ABANCA-RIAZOR e o Dépor tombaron (3-1) a un dos candidatos ao ascenso a LaLiga EA Sports, a UD Almería, en encontro correspondente á 26ª xornada.
Óscar Gilsanz asegura que se marcha cunha sensación "doce. Cando se gaña na casa e faise un primeiro tempo como se fixo é para estar contentos sobre todo polos futbolistas. Fixeron un gran traballo e sobre todo un traballo colectivo moi bo".
Este resultado deixa a Os Nosos con 35 puntos na 10ª posición da clasificación.
Mfulu e Escudero foron baixa por lesión.
Respecto ao encontro en Eibar de hai unha semana, Pablo Martínez relevou a Dani Barcia, Eddahchouri por Barbero e Mella por Gauto.
O choque arrincou con dominio da UD Almería. Robertone, aos 3 minutos, disparou desde fóra da área lixeiramente desviado.
Tras un saque de esquina do equipo andaluz, Yeremay conduciu unha rápida contra. O canario cede ao medio a Mella, este a Mario Soriano, que se atopou co cruzamento dun defensa cando ía xutar a portería.
Aos 13 minutos, Yeremay remata lixeiramente desviado un pase atrás de Ximo Navarro desde a liña de fondo.
Era o mellor o Dépor neste tramo do partido.
Zakaria Eddahchouri, un dianteiro que aterraba en ABANCA-RIAZOR con números de gran goleador na Segunda División de Holanda, enganchou un disparo desde a frontal da área ao que non puido responder Maximiano.
Poñíase por diante o Dépor, previa revisión polo VAR.
O Dépor fíxose co partido e chegou ata a dominar á UD Almería. Baptistao dispara axustado ao pau esquerdo de Helton Leite pero Yeremay, noutra gran xogada por banda esquerda, facía o segundo tras controlar magistalmente na área e bater con frialdade a Maximiano.
En pleno festival branquiazul, Mella fai o terceiro. Rouba Ximo Navarro no centro, cede ao canteirán que, desde a frontal, remata axustado ao pau dereito da meta dun incrédulo Maximiano.
O técnico deporvista destaca "as boas decisións en último terzo, que era algo que falabamos no vestiario".
Ao descanso chegouse cun duro disparo de Baptistao, o mellor do seu equipo, que atalla seguro Helton Leite; pero co partido totalmente controlado polo Dépor, que levou unha ovación da bancada ao sinalar o colexiado o final da primeira parte.
A segunda metade comezou con susto na área deportivista. Nun centro desde banda dereita, Pablo Martínez escorregou no seu intento de despexe pero Luis Suárez, con todo a favor diante de Helton Leite, non foi capaz nin de golpear a pelota.
Luis Suárez probou fortuna desde a frontal aos 52 minutos. O balón foise por encima da portería de Helton Leite.
Apertaba a UD Almería en busca do gol que lle metese no partido pero sen claridade arriba.
Eddahchouri tivo a primeira para o Dépor pero foi ben tapado pola defensa almeriense. O holandés recibiu de Mario Soriano nunha boa transición do Dépor.
Rubi fai un triplo cambio buscando axitar a árbore coa entrada de Melero, Arribas e Arnau.
Yeremay tivo nas súas botas o cuarto. Supera por velocidade á defensa da UD Almería, pica o balón sobre Maximiano pero salva Edgar milagrosamente na mesma raia cando o balón coábase.
No outro área, Helton Leite tapa providencialmente un remate de Arnau, que entrou libre de marca ao segundo pau. Corría o minuto 66.
Pouco despois, Arribas rematou alto noutra boa transición almeriense.
As ocasións sucedíanse nas dúas áreas. Barbero, que relevou a Eddahchouri, non chegou por moi pouco a un centro de Yeremay desde banda esquerda.
O empuxe da UD Almería obrigou ao Dépor a defender en bloque baixo ante o apoio da bancada de ABANCA-RIAZOR: "Cando apertou máis nos xuntamos e defendemos demasiado preto da portería pero era algo que o rival nos obrigaba porque é un dos máximos favoritos ao ascenso", indicou Óscar Gilsanz.
Helton Leite facía unha gran parada a disparo raso de Arribas axustado ao pau esquerdo da portería deportivista. Era o minuto 77.
A base de resistencia, o Dépor foi deixando pasar os minutos, nos que tivo lugar o debut de Genreau ao relevar a Mario Soriano.
No tempo de desconto, con todo sentenciado e os 3 puntos xa amarrados, Luis Suárez fai o gol da honra para a UD Almería tras definir con calidade ante Helton Leite.
Deportivo: Helton Leite, Ximo Navarro, Pablo Martínez, Pablo Vázquez, Obrador, Jose Ángel, Villares (Jaime, min. 85), Yeremay (Diego Gómez, min. 85), Mario Soriano (Genreau, min. 79), Mella (Gauto, min. 79) e Eddahchouri (Barbero, min. 68)
UD Almería: Maximiano, Edgar, Robertone (Melero, min. 60), Lopy, Lázaro (Perovic, min. 80), Luis Suárez, Nico Mr (Arribas, min. 60)., Baptistao (Arnau, min. 60), Marc Pubill, Chumi e Bruno Langa (Centelles, min. 66)
Árbitros: Sesma Espinosa, do comité rioxano. Amoestou a Lopy (min. 44), Jose Ángel (min. 49), Eddahchouri (min. 60), Luis Suárez (min. 75) e Arnau (min. 88)
Goles: 1-0 Eddahchouri (min. 19); 2-0 Yeremay (min. 26); 3-0 Mella (min. 31); 3-1 Luis Suárez (min. 90+3)
Incidencias: partido correspondente á 26ª xornada de LaLiga Hypermotion disputada en ABANCA-RIAZOR ante 22.323 espectadores. Gardouse un minuto de silencio polo falecemento onte sábado de Ceferino Fonticoba 'Fino', utilero do equipo desde 1989 a 2019
