O Fabril cítase este domingo 23 de novembro ás 18:00 (YouTube RC Deportivo) no campo Arsenio Iglesias cun dos aspirantes, a Gimnástica Segoviana CF.
Os fabrilistas, despois do triunfo da pasada fin de semana en Sámano (0-5) son segundos no grupo 1º de Segunda Federación con 23 puntos.
Causa baixa Íker Vidal, expulsado ante os cántabros por dobre amarela. "Non esperabamos esa expulsión porque tiñamos o partido con 0-4. Non pensamos moito nesa situación pero ao final deuse. Non pasa nada. Hai xogadores dabondo. Está Hugo Torres; Teijo, que pode xogar tamén pola esquerda; Mario Hermo; Pablo García... Temos 4 laterais para 2 postos", declarou respecto diso Manuel Pablo na sala de prensa do Dépor Training Center.
O técnico fabrilista confirmou as baixas de Noé, Mane, Enrique, Rubén e "estamos pendentes de Damián, que o outro día tivémolo que cambiar por un golpe".
Advirte Manuel Pablo que a Gimnástica Segoviana CF, recentemente descendida de Primera Federación, "é un equipo moi dinámico que é capaz de facer idas e voltas constantes. O control en zona de ataque téñeno".
Por conseguinte, pide "ter paciencia con balón e tentar que esa presión deles, moi forte e moi constante, non nos faga angustiarnos nin faga que non atopemos solución".
Ademais, "cando teñan balón, xuntarnos moito", conclúe.
Pola súa banda, a Gimnástica Segoviana CF, que a pasada fin de semana venceu por 1-0 ao UP Langreo, manda no grupo con 24 puntos.
Lonxe do seu campo, os casteláns esta temporada gañaron ao Salamanca CF UDS (1-2) e Rayo Cantabria (1-2); empataron co Real Valladolid Promesas (2-2) e Marino de Luanco (0-0); e caeron co CD Numancia de Soria (1-0).
O seu técnico, Iñaki Bea, resalta do Fabril os seus "acenos de identidade clarísimas. Con balón búscache moito a amplitude con 2 extremos, un deles de Segovia (Fabi)".
Advirte que "de mediocampo para adiante é un equipo moi desequilibrante, con extremos moi desequilibrantes, con 2 dianteiros que entre os dous suman 14 goles. Imos tentar afastalos da nosa portería e se non somos capaces polo menos que non teñan eses espazos para poder asociarse".
O Club mantén activo o protocolo de apertura con rexistro de asistentes do campo Arsenio Iglesias.
Poden retirar entradas dispoñibles, até esgotar a bancada e sen ningún custo adicional, todos os socios e socias do RC Deportivo que o tramiten formalmente a través da web bancada.rcdeportivo.es, na que deberán introducir a súa ID de socio e o pin. A continuación, seleccionar unha localidade libre e posteriormente completar os seus datos de contacto e a dirección de correo electrónico onde recibir a entrada.
Con eses mesmos datos doutras persoas socias, unha única pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición e localización na instalación.
O RC Deportivo solicita que unicamente tramiten a entrada aqueles socios e socias que vaian poder acudir ao partido, para evitar que queden afeccionados sen poder asistir unha vez completado a repartición dos asentos nun proceso 100 % telemático.
Tamén está habilitado simultaneamente o sistema de venda de entradas para o público en xeral, a través da mesma plataforma en bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para afeccionados sen carné do RC Deportivo é de 10 euros.
