Ángel García Docampo - "ANGELITO"

TEMPADAS 1912-1923

A Coruña, 1895

O primeiro deportivista que xogou polo menos un partido durante dez tempadas seguidas comezou xogando de dianteiro centro e acabou facéndoo de defensa, e polo camiño viviu desde dentro a evolución dun equipo de afeccionados e amigos ata o profesionalismo, pasando pola escisión do Deportivo Auténtico.

Eduardo González Valiño - "CHACHO"

TEMPADAS 1929-1935, 1936-1944 e 1945-1946

A Coruña, 1911

Coruñés da Costa de San Agustín, xogou no Varela Silvari antes de chegar ao RC Deportivo, co que debutou con só 18 anos e ao que defendeu en diferentes etapas. Foi tres veces internacional coa Selección Española, na que aínda hoxe mantén o récord de máis goles nun só partido, seis ante Bulgaria en 1933.

Francisco Reboredo Mosquera - "REBOREDO"

TEMPADAS 1933-1937 e 1939-1947

Bos Aires, 1914

Aínda que só disputou 81 partidos en Primeira, o incansable centrocampista nacido en Arxentina pero criado na Coruña militou durante doce tempadas no RC Deportivo, formando parte do equipo que logrou o histórico primeiro ascenso á máxima categoría, en 1941.

Pedro López Crespo - "PEDRITO"

TEMPADAS 1936-1938 e 1939-1950

A Coruña, 1917

Defensa coruñés de Monelos, comezou no Oza pero militou toda a súa carreira profesional, co paréntese da Guerra Civil, no RC Deportivo. Alcanzou a internacionalidade absoluta coa Selección Española, sendo a súa estrea e o seu único partido en Riazor, ante Portugal, en 1945.

Manuel Guimeráns Correa - "GUIMERÁNS"

TEMPADAS 1937-1950

Vigo (Pontevedra), 1919

Autor do gol do primeiro ascenso a Primeira, en 1941, defendeu a zamarra do RC Deportivo ao longo de toda aquela década, até o subcampionato de Liga de 1950, alcanzando os 280 partidos, cifra extraordinaria para a época, e os 90 goles.

Juan Acuña Naya - "JUAN ACUÑA"

TEMPADAS 1937-1955

A Coruña, 1923

“Xanetas” nunca abandonou o RC Deportivo malia os cantos de serea de Madrid. Dezaseis tempadas nas filas blanquiazules e nada menos que catro veces porteiro menos goleado de Primeira. Con 231 partidos, é o gardameta que máis xogou en Primeira co Dépor.

Antonio Villar Chao - "CHAO"

TEMPADAS 1939-1949

A Coruña, 1921

Integrante do equipo que, en 1941, logrou o primeiro ascenso a Primeira e da formación que disputou o primeiro partido do RC Deportivo na máxima categoría. Durante dez tempadas foi practicamente indiscutible no extremo esquerdo blanquiazul.

Carlos Calvo Cotelo - "CARLITOS"

TEMPADAS 1944-1954

A Coruña, 1923

Dez tempadas prestou os seus servizos no RC Deportivo despois de formarse na Fábrica de Armas ás ordens de Don Rodrigo García Vizoso. No seu currículo figuran dous ascensos e un histórico subcampionato de Liga en 1950.

Enrique Ponte Veira - "PONTE"

TEMPADAS 1945-1954 e 1959-1961

A Coruña, 1925

Peza dunha das liñas defensivas máis míticas do RC Deportivo, a do equipo que alcanzou o primeiro subcampionato de Liga en 1950, disputou nada menos que 231 partidos oficiais nunha época na que se xogaban moitos menos encontros.

José María Martín Rodríguez - "CHECHÉ MARTÍN"

TEMPADAS 1948-1950

A Coruña, 1924

Emigrado a Arxentina en 1937 despois de dar as súas primeiras patadas no Recheo de San Diego e no campo da Estrada, regresou desde Francia en 1948 para xogar dúas campañas no RC Deportivo, co que foi peza clave do equipo que estivo a piques de conquistar o campionato de Liga en 1950.

Juan Ignacio Otero Couceiro - "OTERO"

TEMPADAS 1951-1958

A Coruña, 1929

Sucesor natural de Acuña, co que compartiu varias tempadas no RC Deportivo, fíxose coa titularidade na campaña 1953-1954 e alzouse co trofeo Zamora de Primeira División. “Parrocho” ou “Floreal”, como era coñecido, militaría despois con éxito no Betis e no Granada.

Luis Suárez Miramontes - "LUIS SUÁREZ"

TEMPADAS 1953-1954

A Coruña, 1935

Coruñés de Monte Alto, o seu primeiro equipo foi o Perseverancia. A súa irrupción no RC Deportivo fixo que recalase xa moi novo no Barcelona. Alí foi elixido “Balón de Ouro”, único español en conseguilo a día de hoxe, e coa Selección Española, coa que xogou en 32 ocasións, proclamouse campión de Europa en 1964.

Amancio Amaro Varela - "AMANCIO"

TEMPADAS 1958-1962

A Coruña, 1939

Coruñés da rúa Vizcaya, formado no Victoria, explotou no RC Deportivo, co que asinou 69 goles en catro tempadas e foi “pichichi” de Segunda, antes de fichar polo Real Madrid e proclamarse campión de Europa en 1964 coa Selección Española, coa que disputou 42 encontros.

José Luis Fidalgo Veloso - "VELOSO"

TEMPADAS 1958-1965

Santiago de Compostela, 1937

Terceiro máximo goleador histórico do RC Deportivo, con 106 goles ao longo de sete campañas, foi o primeiro “pichichi” blanquiazul, ao proclamarse máximo goleador da Segunda División na tempada 1960-1961.

José Domínguez Rial - "DOMÍNGUEZ"

TEMPADAS 1960-1971

Vigo (Pontevedra), 1940

Un dos indiscutibles durante a época do RC Deportivo “ascensor”, viviu catro descensos e cinco ascensos como líder da defensa blanquiazul, case sempre no lateral esquerdo, ao longo de once tempadas e en máis de 300 encontros, 131 deles en Primeira.

Manuel Loureda Calvete - "LOUREDA"

TEMPADAS 1961-1974

A Coruña, 1941

Formado, do mesmo xeito que Juan Acuña, no Sporting Coruñés, foi un dos grandes símbolos do RC Deportivo “ascensor”. Disputou máis de 300 partidos coa elástica blanquiazul ao longo de doce campañas, nas que viviu nada menos que catro ascensos e seis descensos.

Manuel Ríos Quintanilla - "MANOLETE"

TEMPADAS 1964-1972

A Coruña, 1945

Coruñés da rúa da Torre, xogou no Perseverancia, continuou no Deportivo Ciudad, pasou ao Fabril e chegou ao RC Deportivo, co que disputou preto de 250 encontros. Xogou dous partidos coa Selección Española na súa última campaña como blanquiazul, contra Irlanda do Norte e Grecia.

Alfonso Federico Castro Rivera - "ALFONSO CASTRO"

TEMPADAS 1912-1923

Ferrol (A Coruña), 1955

Máximo goleador de Segunda División na Tempada 1977-1978, sendo futbolista do RC Deportivo. De blanquiazul pasou por Segunda, Segunda B e Terceira, anotando un total de 93 goles que o converten no sexto artillero da historia.

Ramón Piña Martínez - "PIÑA"

TEMPADAS 1973-1983

Buño (A Coruña), 1953

Máis de 300 partidos en dez tempadas co primeiro equipo do RC Deportivo, defendeu a camiseta blanquiazul en Segunda, Segunda B e Terceira, quedando ás portas de facelo en Primeira no seu último ano como xogador deportivista.

Carlos Alberto Ballesta Edreira - "BALLESTA"

TEMPADAS 1974-1985

San Pedro de Nós (A Coruña), 1955

Máis de 250 partidos en once tempadas co primeiro equipo do RC Deportivo, o defensa de San Pedro de Nós é un dos poucos futbolistas que defendeu a camiseta blanquiazul en tres categorías: Segunda, Segunda B e Terceira.

Francisco García Fernández - "PANCHO GARCÍA"

TEMPADAS 1975-1985

Ferrol (A Coruña), 1951

330 partidos oficiais e medio cento de goles en dez tempadas, foi capitán e líder do RC Deportivo durante boa parte da “longa noite de pedra” dos anos 70 e 80. O seu cambio de ritmo e a súa velocidade de condución marcaron boa parte daquela época de desilusións en Riazor.

Jorge García Santos - "JORGE"

TEMPADAS 1977-1991

A Coruña, 1957

Porteiro da casa durante tres lustros, defendeu a portería do RC Deportivo en 323 partidos, sendo as súas actuacións máis memorables en diversas tandas de penaltis, a súa gran especialidade, en eliminatorias de Copa do Rei.

José Luis Vara Olveira - "JOSÉ LUIS"

TEMPADAS 1978-1987

Esteiro-Muros (A Coruña), 1958

Nun feito sen precedentes no fútbol español, foi o “Pichichi” de Segunda División sen ser dianteiro, con 16 goles, na Tempada 1982-1983, a campaña na que o RC Deportivo quedou a só un gol de ascender a Primeira.

José Ramón González Pérez - "JOSÉ RAMÓN"

TEMPADAS 1987-1995 e 1998-1999

Carreira-Riveira (A Coruña), 1968

O maior dos irmáns González Pérez levantou o primeiro título oficial do RC Deportivo, a Copa do Rei de 1995. Militó no conxunto blanquiazul durante dez campañas, en dúas etapas, participando en máis de 200 encontros.

Francisco Javier González Pérez - "FRAN"

TEMPADAS 1987-2005

Carreira-Riveira (A Coruña), 1969

O xogador que máis partidos oficiais disputou coa camiseta deportivista (700) e un dos tres que gañou os seis títulos máis recentes que ten o RC Deportivo nas súas vitrinas. Récord de partidos en Primeira (435) e en Europa (66) xunto a Valerón. Case dúas décadas vestindo o ‘10’ blanquiazul.

Francisco Liaño Fernández - "LIAÑO"

TEMPADAS 1991-1996

Maliaño (Cantabria), 1964

Con dous trofeos “Zamora” consecutivos nas súas vitrinas, nas Tempadas 1992-1993 e 1993-1994, o gardameta cántabro exemplificou as tremendas virtudes defensivas do RC Deportivo a comezos dos anos 90.

José Roberto Gama de Oliveira - "BEBETO"

TEMPADAS 1992-1996

Salvador de Bahía (Brasil), 1964

Con 86 dianas é o máximo goleador do RC Deportivo en Primeira División. Autor do primeiro tanto do Club en Europa e primeiro “pichichi” blanquiazul na máxima categoría (Tempada 1992-1993), foi campión do mundo con Brasil en 1994 sendo xogador do Dépor.

Mauro da Silva Gomes - "MAURO SILVA"

TEMPADAS 1992-2005

São Bernardo do Campo (Brasil), 1968

Terceiro xogador con máis partidos oficiais co RC Deportivo ás súas costas, con 458, e un dos tres que gañou os seis títulos máis recentes que ten o Club nas súas vitrinas. Tamén foi campión do Mundo en 1994 con Brasil sendo futbolista blanquiazul.

Donato Gama da Silva - "DONATO"

TEMPADAS 1993-2003

Río de Xaneiro (Brasil), 1962

Dez tempadas disputou o hispano-brasileiro coa elástica blanquiazul. O autor do gol que abriu o camiño do triunfo no partido do título de Liga é o quinto futbolista que en máis ocasións, case 400, defendeu as cores do RC Deportivo.

Jacques Celestin Songo'o - "SONGO'O"

TEMPADAS 1996-2001 e 2003-2004

Sakbayenne (Camerún), 1964

O porteiro camerunés levou o trofeo “Zamora” na Tempada 1996-1997, na primeira das súas seis campañas no RC Deportivo, nas que disputou un total de 180 partidos coa elástica blanquiazul, coa que conquistou a Liga.

Manuel Pablo García Díaz - "MANUEL PABLO"

TEMPADAS 1998-2016

-, 1976

Ninguén defendeu a elástica do RC Deportivo durante máis tempadas ca el: 18. O número ‘2’ da súa camiseta é tamén o número 2 na clasificación de partidos oficiais disputados co primeiro equipo blanquiazul, con 482.

Rudolphus Antonius Makaay - "MAKAAY"

TEMPADAS 1999-2003

Wijchen (Países Baixos), 1975

Máximo goleador de Primeira, sendo futbolista do Dépor, na Tempada 2002-2003, o que lle valeu a “Bota de Ouro” ao maior artilleiro do fútbol europeo. O dianteiro holandés marcou 97 goles en só catro tempadas nas filas do RC Deportivo.

Diego Tristán Herrera - "TRISTÁN"

TEMPADAS 2000-2006

La Algaba (Sevilla), 1976

Máximo goleador da historia do RC Deportivo, con 110 tantos, é tamén o principal artillero tanto na Liga de Campións (15) como na suma de todas as competicións europeas (16) e un dos tres “pichichis” blanquiazules en Primeira (Tempada 2001-2002).

Juan Carlos Valerón Santana - "VALERÓN"

TEMPADAS 2000-2013

Arguineguín (Las Palmas de Gran Canaria), 1975

O “mago de Arguineguín” deleitou ao público de Riazor durante trece tempadas. Un dos catro futbolistas que superaron os 400 partidos co RC Deportivo (422) malia sufrir dúas graves lesións. Récord blanquiazul en Europa (66 partidos) xunto a Fran.