O DÉPOR RECIBE ESTE DOMINGO 17 DE MAIO ÁS 14:00 EN ABANCA-RIAZOR AO FC ANDORRA E "HAI QUE SUMAR DE 3, NON MIRAR MOITO MÁIS"

O Dépor mídese este domingo 17 de maio ás 14:00 (LaLiga TV Hypermotion) ao FC Andorra en ABANCA-RIAZOR, en partido correspondente á 40ª xornada en LaLiga Hypermotion.Co triunfo en Cádiz o pasado venres 8 de maio, Os Nosos chegan ao choque con 71 puntos na 2ª posición, os mesmos que a UD Almería (3º).Antonio Hidalgo teno claro: "a estas alturas hai que sumar de 3 en 3, non hai que mirar moito máis". "Cada semana imos volver falar do mesmo: en gañar, en centrarnos no máis inmediato, que é o importante", engade.Para o encontro, Lucas Noubi está sancionado por acumulación de amonestacións pero si está á disposición do equipo Yeremay, despois de estimar o Comité de Disciplina as alegacións á acta presentadas polo RC Deportivo e deixar sen efectos disciplinares o cartón amarelo que o canteirán viu no JP Financial Estadio de Cádiz.O técnico deportivista afirmou ao respecto que "é unha noticia moi boa. O que pasou no campo co que se redactou na acta non cadraba. Tiñamos moita fe en que prosperase. Así foi. Temos a Yere no campo, con moita ilusión, con moita forza, preparado para seguir axudándonos como o está a facer".Os Nosos, cos canteiráns Bil, Noé e Samu co grupo, realizaron este sábado 16 de maio unha última sesión de traballo, cunha activación, un exercicio táctico de transicións, un partido e un repaso ás accións a balón parado.David Mella e Charlie Patiño, este con unhas molestias nun adutor, estiveron con adestramento personalizado.Con 15 puntos, o Dépor é o equipo da categoría con maior impacto competitivo directo desde o banco. Non en volume, xa que é o 5º en goles de suplentes, pero lidera en significancia con 15 puntos.É dicir, os goles que chegan desde o banco non son para ampliar vantaxes, son para cambiar a dinámica do marcador.Antonio Hidalgo cre que "fumos quen de darlle importancia a moitos futbolistas. Os xogadores entenderon esa competitividade no adestramento. Vai chegando o final e os futbolistas vano vendo. Os xogadores están a dar moito rendemento desde o banco. Os partidos cada vez máis vanse decidindo nas partes finais. Estou contento con esta contribución".

Pola súa banda, o FC Andorra, que a pasada fin de semana goleou (5-1) á UD Las Palmas, chega lanzado na 10ª posición con 58 puntos.No partido da primeira volta disputado o 21 de decembro de 2025 no Nou Estadi Encamp venceron os andorranos por 1-0.Lonxe do seu campo esta tempada, o equipo que prepara Carles Manso gañou ao Real Zaragoza (1-3), Real Racing Club (1-2), Real Valladolid (0-1), CD Mirandés (1-2), Córdoba CF (1-4), Cultural Leonesa (0-4), Cádiz CF (0-1) e CD Leganés (0-4); empatou coa UD Las Palmas (1-1), SD Huesca (2-2), Sporting de Gijón (1-1) e Granada CF (1-1); e caeu coa SD Eibar (2-0), Real Sociedad B (3-0), Málaga CF (4-1), Albacete Balompié (1-0), AD Ceuta FC (2-1), CD Castellón (2-0) e UD Almeria (3-2).O FC Andorra mantén a mesma forma de xogar no 84% dos partidos disputados (33 de 39), caracterizada polo dominio territorial, a posesión e a presión tras perda. ​En partidos como visitante esta porcentaxe descende até o 77% (14 de 18), pero aínda así segue a ser un rexistro elevado dentro da competición, sendo un dos equipos que máis fiel se mantén ao seu estilo tanto como local como visitante.Desta forma, é o equipo con máis posesión de LaLiga Hypermotion cun 60,7%.O treito final de partido concentra o maior volume ofensivo do rival do Dépor este domingo, con 20 goles entre o 75’ e o 90’.Ademais, este mesmo período coincide tamén cos tramos de maior fraxilidade defensiva, con 13 goles encaixados.Carles Manso afirmou na sala de prensa que "para nós é un orgullo visitar un campo histórico como é ABANCA-RIAZOR" e cre que o seu equipo está ante "unha oportunidade perfecta para conseguir superar os 59 puntos", mellor puntuación do FC Andorra no fútbol profesional.Pola súa banda, o deportivista Alex Petxarromán, cedido no conxunto andorrano, asegura que "o máis importante é gozar deste treito final e rematar a temporada da mellor maneira".Finalizado o encontro, Os Nosos adestraranse de novo o luns 18 de maio a partir das 10:30 no Dépor Training Center.