A RC DEPORTIVO FUNDACIÓN, IKEA E A UDC ÚNENSE PARA IMPULSAR A AUTONOMÍA DE DEPORTISTAS CON DIVERSIDADE FUNCIONAL

A RC Deportivo Fundación impulsou un pioneiro proxecto piloto en alianza con IKEA A Coruña e a Universidade da Coruña, a través da Facultade de Ciencias da Saúde e, máis concretamente, desde o Grao en Terapia Ocupacional no marco dunha das súas iniciativas de Aprendizaxe-Servizo (ApS).Desenvolvida ao longo da temporada 2025-26 e concluída o pasado mes de setembro, esta colaboración tripartita orientouse a analizar o impacto, as necesidades de apoio e a accesibilidade dos deportistas con diversidade funcional en contornas de aloxamento como hoteis ou residencias, procurando solucións reais para promover a súa plena autonomía durante as concentracións.O estudo foi articulado por un alumno de 4º curso do Grao en Terapia Ocupacional da UDC no marco do seu Traballo de Fin de Grao (TFG).Mediante unha metodoloxía práctica e interdisciplinaria, a investigación avalía como a contorna física e instrutiva inflúe no benestar dos xogadores con discapacidade intelectual.A colaboración universitaria dota o proxecto dun rigoroso marco académico e social, transformando a aprendizaxe nunha ferramenta de impacto real vinculada ao deporte adaptado.Durante a fase de campo, realizouse a proba directa de produtos de apoio e adaptacións funcionais en espazos de aloxamento coa participación activa dos propios deportistas.Grazas ao asesoramento e ao material especializado facilitado por IKEA, formuláronse e probáronse diversas solucións para optimizar a accesibilidade e a autonomía durante as estadías. Estas medidas abranguen desde a sinalización sensorial e cognitiva ata o redeseño ergonómico dos espazos, facilitando as rutinas diarias durante as viaxes e concentracións do equipo.Con este proxecto, as 3 institucións reforzan o seu compromiso coa inclusión, a innovación social e o desenvolvemento persoal. Os achados obtidos non só lles proporcionarán unha maior independencia aos equipos do club nos seus desprazamentos, senón que sentarán as bases para futuros modelos de aloxamento máis accesibles e inclusivos no sector turístico e deportivo.A RC Deportivo Fundación reafirma así a súa visión do deporte como un motor esencial para derrubar barreiras na comunidade.