Jairo Noriega Figueroa (A Coruña, 14 de agosto de 2003) regresa ao RC Deportivo após unha exitosa temporada no Ourense CF de Primera Federación. Firma até 2028, con opción a unha temporada máis.
Formado en ANOSACANTEIRA desde benxamíns na mesma xeración que Dani Barcia, este centrocampista ofensivo xogou 29 partidos esta pasada temporada (2024-25) no Ourense CF, marcou 2 goles e deu 3 asistencias; ademais de disputar 4 partidos en Copa del Rey, con 2 goles e 1 asistencia.
En Segunda Federación co Fabril (temporada 2023-24) disputou 26 partidos, con 2 goles e 2 asistencias.
Debutou co primeiro equipo o 1 de novembro de 2023, con motivo do partido de Copa del Rey entre o Deportivo e o CD Covadonga disputado en Langreo.
No curriculum de Jairo Noriega tamén figuran dous partidos co Xuvenil A na Youth League (temporada 2021-22), ante o Maccabi Haifa e o Dinamo de Kiev, ambos en ABANCA-RIAZOR.
Con este futbolista coruñés, o Club redobra a súa aposta polo talento formado na Cidade Deportiva de Abegondo co obxectivo de ir sentando as bases do RC Deportivo do futuro.
