CELEBRADO O PRIMEIRO FORO SOCIAL DO RC DEPORTIVO; UN ESPAZO DE CONVERSA, REFLEXIÓN E CONSTRUCIÓN CONXUNTA ENTRE O CLUB E A SÚA COMUNIDADE SOCIAL

O RC Deportivo celebrou este martes 12 de maio o I Foro Social, un espazo de diálogo e participación impulsado co obxectivo de reforzar as canles de escoita activa coa súa masa social e abordar algúns dos principais retos estratéxicos, sociais e institucionais da entidade.Durante o encontro, celebrado en ABANCA-RIAZOR, o Club compartiu coas persoas asistentes distintas liñas de traballo vencelladas á celebración do 120 aniversario do RC Deportivo, unha data especialmente relevante para a entidade e para todo o deportivismo.Neste contexto, o Foro nace coa vocación de consolidarse como un espazo estable de conversa, reflexión e construción conxunta entre o Club e a súa comunidade social.No marco deste 120 aniversario, o RC Deportivo trasladou ás persoas asistentes algunhas das principais iniciativas nas que está a traballar, entre as que destacan a Iniciativa Historias Deportivistas, a campaña '1906 nos une', a organización dun torneo de fútbol de afeccionados, a celebración dun encontro mundial de peñas, o desenvolvemento do 'Camino de las Estrellas', así como a creación dun posible himno e dun festival de música.A xornada permitiu ademais intercambiar impresións sobre diferentes ámbitos relacionados co futuro da entidade, o fortalecemento do vínculo coa afección e o papel social e identitario que o RC Deportivo desempeña dentro da cidade e de Galicia. Todas as persoas asistentes ao Foro Social, abonados representativos de diferentes perfís xeracionais, sensibilidades e zonas do estadio, puideron trasladar as súas impresións, inquedanzas e propostas nun contorno de diálogo directo co Club.Neste marco, o RC Deportivo trasladou ás persoas asistentes que realizará antes de rematar a temporada unha consulta vinculante dirixida aos abonados e abonadas do Club sobre o topónimo oficial que debe acompañar a denominación da entidade. A iniciativa compartiuse no contexto do I Foro Social e enmárcase dentro dunha reflexión institucional baseada en criterios de legalidade, coherencia administrativa e escoita activa á masa social. O Club ofrecerá máis información sobre o procedemento e o desenvolvemento da votación en datas próximas á súa celebración.A entidade reafirmou ademais o seu compromiso cunha comunicación máis próxima, transparente e bidireccional. Este Foro Social nace con vocación de permanencia, co obxectivo de manter un contacto continuo coa afección e dar continuidade a futuras reunións e espazos de participación antes de que remate o presente ano natural.