ANTONIO HIDALGO: "O EQUIPO SEMPRE ESTÁ VIVO, COMPITE E ISO EN PRIMERA DIVISIÓN É COMPLICADO"

Antonio Hidalgo manifestou na sala de prensa do Dépor Training Center que no descanso do encontro no RCDE Stadium ante o RCD Espanyol "díxenlles que era importantísimo seguir vivos no partido. Sempre falamos da competitividade que ten o equipo. Somos conscientes de que temos que mellorar cousas. O equipo na segunda parte estivo moito máis axustado que na primeira. É un momento para recuperar xente fisicamente, sobre todo xente que vén dunha lesión como Auba, Marc (Casadó)... a xogadores con moitos minutos nas pernas. Hoxe (por onte) pesoulles algo máis".En definitiva, o técnico deportivista está "contento co punto, con esa portería a cero que viñamos buscando"; e destaca nesta liña que "o equipo sempre está vivo, compite e iso en Primera División é complicado".Iso si, tamén admitiu que ante os espanyolistas "non estivemos cómodos en ningún momento. Na primeira parte tivemos fases de ter o balón. Non eramos capaces de levar o balón dun lado a outro, como adoitamos facer. Intentabamos acabar a xogada polo mesmo lado e aí o RCD Espanyol igualábanos as posicións cos seus dous mediocentros con Yeremay e con Luis. Na segunda parte xogaron máis arriba e estivemos máis incómodos. O traballo deu o seu froito, sobre todo defensivamente. E sempre é importante sumar".Tamén se amosou "contento polo partido de Leo Román. Necesitaba ese partido. Sostívonos. Estou contento por sumar, 4 puntos de 6. Agora tamén toca descansar un pouco".Finalmente Antonio Hidalgo lembra que "hai días que estás máis acertado, días que algo menos. Tamén hai un rival que che propón cousas e che pon dificultades. Fomos capaces de axustar, de seguir vivos, de ser competitivos, de saber onde estaban os pares para poder saír á presión especialmente na segunda parte. O nivel para poder competir ao 100% temos que telo sempre moi alto porque, se non, as cousas ao final pódenche complicar".