O DÉPOR CONCLÚE ESTE VENRES 25 CUN AMIGABLE EN PENAFIEL A PRIMEIRA SEMANA DE PARÓN DESPOIS DE CUMPRIR O SOÑO DOS CANTEIRÁNS MAURO VALEIRO, LEANDRO ALTIERI E FRANK IGLESIAS

Nesta primeira semana de parón polos compromisos das seleccións nacionais, o Deportivo disputa un partido amigable este venres 25 de setembro ante o FC Penafiel no Estadio 25 de Abril, en Penafiel (Portugal).O encontro dará comezo ás 20:00 hora galega (19:00 hora local) e será retransmitido en directo pola canle oficial de YouTube do RC Deportivo.O amigable enmárcase na relación que manteñen ambas as entidades e permitirá aos seus respectivos proxectos deportivos compartir unha xornada sobre o terreo de xogo, ademais de reforzar os vínculos institucionais existentes entre o RC Deportivo e o club portugués.Os Nosos viaxarán a Portugal con varias ausencias.Non estarán os internacionais, concentrados coas súas respectivas seleccións nacionais: Nsongo Bil con Camerún, Lucas Noubi con Bélxica sub-21, Bright Ede con Polonia sub-21 e José María Giménez con Uruguai.Ademais, serán baixa por lesión Marc Casadó; Pierre-Emerick Aubameyang, operado con éxito este mesmo xoves do seu xeonllo dereito no Centro Olympia de Madrid; e Zakaria Eddahchouri, que será intervido este venres 25 no Hospital HM Modelo de A Coruña dunha lesión no seu pulso esquerdo.Traballaron de xeito personalizado Amatucci e Noé, que xa realiza algunha tarefa co grupo.

Os protagonistas tamén foron os canteiráns xuvenís Mauro Valeiro Méndez (A Coruña, 10 de marzo de 2009), Leandro Altieri de León (A Coruña, 21 de abril de 2008) e Frank Iglesias Varela (A Coruña, 5 de setembro de 2008).Os 3 coruñeses viron cumprido un dos seus soños ao adestrarse por primeira vez co Dépor ás ordes de Antonio Hidalgo.O centrocampista Mauro Valeiro (na foto principal da noticia), internacional nas categorías inferiores da selección española e que chegou ao Club no primeiro ano de benxamíns, está en dinámica de Fabril e xa participou en 2 encontros en Primera Federación.Pola súa banda, o dianteiro Leandro Altieri, en Abegondo desde o segundo ano de benxamíns; e o interior Frank Iglesias, deportivista desde o segundo ano alevín, militan no Xuvenil A de División de Honor.O corpo técnico dispuxo, tras unha activación con xogos, unha tarefa de finalizacións, fútbol en espazo reducido e un ensaio de accións a balón parado.

Pola súa banda, o FC Penafiel que dirixe o ex deportivista José Manuel Aira, xoga na Segunda División de Portugal.Despois de 6 partidos, os lusos marchan na 2ª posición con 13 puntos.Nas filas do FC Penafiel militan 4 exfutbolistas branquiazuis: Eric Puerto, Jaime Sánchez, Davo e Max Svensson.Os abonados do RC Deportivo poden adquirir 2 entradas a un prezo de 5 euros cada unha. O prezo para o público en xeral será de 10 euros.Para beneficiarse desta promoción, cada abonado debe identificarse como tal durante o proceso de compra. As entradas para o partido poderanse adquirir a partir de mañá, xoves 17 de setembro, a través da plataforma oficial de venda, premendo nesta ligazón.Deste xeito, o encontro en Penafiel supón tamén unha oportunidade para que os deportivistas que se despracen a Portugal poidan acompañar o equipo e vivir xunto á afección local unha xornada de convivencia entre dous clubs unidos por unha relación institucional e deportiva.Finalizado o choque, o Dépor retoma os adestramentos o mércores 30 de setembro ás 10:30 no Dépor Training Center.